Shillong, Naiwieng 04: U bah Pangniang ula ong ba ka daw kaba la pynlong ia ka HSPDP ban weng jingkyrshan kadei namar ka jinglong jingman ha ka jylla bad khamtam haba ka seng ka ieng ha ka nongrim ban dawa ban pyntreikam ia ka Inner Line Permit ha ka jylla.
Shuh shuh ula iathuh ruh ba shwa ban iatai ia ka mat ILP hapoh ka dorbar, ki dkhot ka HSPDP kila dep iakren bad u CEM ban pdiang ia ka Resolution halor ka ILP, bad u CEM ula kular ban shimkhia ia ka jingdawa ka HSPDP hynrei hadien pat ula kyntait noh ia kane ka jingdawa kaba la buh da ka seng bad u CEM bad ka Executive Committee kila shimkhia tang ia ka mat kaba iadei bad ka Village Administration Bill.
Haba kylli pat balei kim shym la kyrshan ia ka Resolution kaba la wanrah hapoh ka dorbar ban kyntu ia ka sorkar jylla ban pyntreikam ia ka ILP, na ka liang u bah Pangniang ula ong ba “Ka seng ka ieng skhem bad bat skhem ia ka jingiatehkular bad ka KHUDA hynrei kala shah kyntait pat ia ki jingdawa kiba kala buh hakhmat ka EC kaba la ialam da u bah Syiem bad dei halor kane ka nongrim ngi lah weng ia ka jingkyrshan” la ong u bah Pangniang.
Kam don jingmut ba ngin pyrshah ia ka KHUDA katba ngi dang don hi hapoh ka KHUDA, ngi iengskhem ha ka jingkular kaba ngi lah iateh, hynrei haba ka jingkular kam poi shaei shaei ruh, kan bha ba ngi weng noh ia ka jingkyrshan namar ngin long laitluid ban kren halor ka jingeh jong ka jaidbynriew bad lada ngi don hapoh ka EC ngin shah the sha khum” la ong u bah Nongsiej.
“Ka ILP kadei ka mat jong ka jaidbynriew bad kum ki nongmihkhmat kiba lah shah jied ngim sngew hun ban shu sngap jar, dang lah ka jaidbynriew ban ia ka shuki kaba ngi shong” la pynkut u bah Nongsiej.
Ha kawei pat ka liang u bah Pangniang ula ong ba ka HSPDP ka pyrshah jur bad pynrem jur halor ka jingkem bad jingpynngat ia ki nongialam kiba dawa ban pyntreikam ia ka ILP hapoh ka ain MPDA bad ula ong ruh ba ka seng ka pynrem jur halor ka jingpynngat MPDA ia u President ka HANM West Khasi Hills u bah Arphul Kharbani.
Nalor kane ula kyrpad ruh ia ka sorkar jylla bad pyllait noh bad weng noh ia ki kyndon kiba ki dkhot bad ki nongialam kila shha pynngat khnang ban wanrah biang ia ka shongsuk shongsain sa shisien pat bad ula kyntu ruh ia ka sorkar ba kadei ban khot iakren noh ia ki sengbhalang ban ia poi noh sha ka jingiasngewthuh jingmut. (SP News)
