Jowai, Risaw 24: Ka jingia kynduh bad iamir jingmut lang jong ki ar seng ka JYF&JSU ki pynpaw ba kim lah ban pdiang ia ka jingthmu jong ka sorkar ban
pyntreikam da ka ain ka ban pynkulmar khlieh ia ki nongaiwai ing bad
nongshong ing wai ka Meghalaya Regulation of Landlords and
Verification of Tenant’s Act 2013 da ka sorkar MUA- II.
“Ngim lah ban pdiang ia ka jingkam u Myntri Rangbah ba da kaba
pyntreikam ia ka Tenancy Act, lah ban iada ia ki briew kiba nabar,
hynrei ka dei tang ka jingkren pyllait jynhaw jong u namar u tip shai
ba tang ka ILP ka long kaba biang tam,” ong ki tei ki nongialam. ka
por ka la dei ban kyndit noh kum ki nongmihkhmat ba kim dei ban da
khmih lynti than ia ki vote bank jong ki bar jylla, hynrei donkam ban
pyrkhat ruh na ka bynta ka lawei jong ka Ri bad ka Muluk.
Ka jingdon jong ka JHADC,KHADC,GHADC ka long halor ka nongrim ban iada
ia ka ri bad ka jaidbynreiw lyngba ki kyndon ain kiba khanglad ia ki
mynder bad bar jylla ban ym ioh long trai ha ka no ka no ka bynta ka
ban ktah ia u trai ri trai muluk, hynrei kam shym long kumta kumba ngi
angnud bad khmih lynti. Ba dei halor kane ka nongrim ba ka ILP ka
donkam kyrkieh ban pyntreikam ha baroh kawei ka jylla Meghalaya khnang
ba u kup shiliang u sem shilliang un myntoi lang bad shngain lyngba ka
ne ka ain ka ban khanglad ia ki heh spah bar jylla ban ioh knieh ia ka
kamai kajih na ki trai Ri.
Hynrei u Myntri Rangbah ka Sorkar pat mar khongpong bad ka mon jong u
paitbah, u kwah pynban da ka ain ing wai ban pynjynjar ia ki khynnah
skul nongkyndong kiba shong ingwai ha sor ban ioh ia ka jingstad bad
khamtam ia ki trai ing wai kan long ka jingma ia ki lada ki ai wai ing
ia ki bar ri ne bar jylla ba hadien ha bud ki lah ban shah knieh noh
wat ia hok longtrai ruh namar lada ki mut ban beh ne pynmih noh ia ki
nongshongwai ki lah ban shah ai mukotduma pyrshah ha ki nongshaongwai
namar ka ne ka tenency act kan ktah mationg ia ki trai ing pynkut u
kyrwoh na ki tei ki nongialam.(SP News)
