Shillong, Risaw 29:Ka District Council ka dei ban pynsangeh noh ia ka jingklong maw ha ka wah Majai, bad ban tehlakam ruh ia ki nongkhaii kiba tih maw na katei ka wah kaba la pynjulor shi katdei, la ong u Bah James Ban Basaiamoit MDC, na Mawkhar uba la buh jingkylli ha ka iing, hato ka District Council ka la ai jingbit iaki khar bangla ban tih maw na Majai.
“Ki khar bangla da ki hajar ki wan ban tih maw man ka sngi na Majai hynrei ka District Council shym la leh eiei,” ula ong.
U bah Titos Chyne MDC (UDP) na Sohra haba bynrap halor ka jingkylli ba la wanrah da u bah James, u la ong, ka District Council ka dei ban khang noh ia ki nongtih bad ki nongkhaii maw kiba ju tih na katei ka wah Majai lada kim ioh jingbit (NoC) na ka Council. “Ka long ka jingduhnong ia ka Council lada kam lah ban tehlakam ia ki nongkhaii,” ula bynrap.
Haba jubab, u Bah Jansing Tynsong, MDC na Lyngkyrdem uba long ruh EM ula ong, “Ka Council ka don ka bor khang ia ka jingtih maw, hynrei haduh mynta kam pat ioh kano kano ka jingujor halor katei ka jingtih maw ha wah Majai.”
Ula ong, ba ka liang ka Executive Committee kan sa peit bniah ia katei ka kam bad ban tehlakam katkum ki kyndon ia ki nongtih maw na katei ka wah bad kumjuh ki nongkhaii.(SP News)
