Shillong, July 26: Ka khubor a ka Vanamahotsava ka long,” man u wei, hikai u wei, thungdieng u wei” ia kane ka jingialang la pynlong ha Good Shepherd Higher Secondary School, Jongksha, East Khasi Hills District, da ka Social Forestry Division, East Khasi Hills, ha kaba u M S Rao Principal Secretary ka sorkar Meghalaya u ba dei peit ia ka tand khlaw u la long u kongsan.
Ka jingthmu jong ka ktien Vanamahotsava, kaba mud ka sngiburom ia ki dieng, ha kaba kane ka jingrakhe ka long ha baroh kawei jong ka Ri India. Ka jingthmu jong kane ka long ban pynneh pynsah ia ka mariang bad ia kane la sdang nyngkong da u myntri jong ka sorkar pdeng ba mynshuwa u P Munshi, ha u snem 1950.
Ha ka jingkren jongu Bah R. Pyngrope, MLA jong kane ka jaka u la ong ba ka jingkylla jong ka mariang ka long kaei kaei kaba la pynpyrkhat ia baroh yn tang ha kane ka jaka hynrei ha ka pyrthei baroh kawei. U la kyntu ia baroh ki khynnah skul ba kin sngewthuh ia kane bad shim khia ban thung dieng.
Ha ka jingkren jongu M S Rao, u la ong kane ka jingleh burom ia ki dieng ka dei ka jingleh burom jong ki paidbah. La ong ba da ka jingdon jong ki khlaw ka wanrah ia ka jingpynneh pynsah ia ka um namar lyngba jong ki dieng la lah ban bat ia ka um. Ka phang pdeng kaba kongsan eh jong kane ka long ban hikai ia ki briew ban sngewthuh ia ka jingdon kam ban thung dieng.
La ong ba kane ka pateng bynriew kaba mynta ka dei ka dawbah ba la pynjop ia ka marianghaduh katne kumba ka long mynta bad ka la long ka jingma ia ki briew kiba don ha kane ka sla pyrthei bad ban wanrah ia ka mariang kaba khuid kaba suba dei tang ka jingdon ia ki khlaw ki btap.
Ha kane ka sngi ka la don ka jingthung dieng sawdong jong katei ka skul da ki khynnah skul.Kiwei kiba la kren ha kane ka sngi ki long u Fr. D Konuran, Principal Good Shepherd HS School, Jongksha, u Bah Medistar Warbah, ex-MLA bad u Myntri ka Khyrim Syiemship.(SP News)
