Shillong, Risaw 02: Ka Dorbar Grand Council of Chiefs of Meghalaya (kaba kynthup ia Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ka Dorbar Ki Dolloi, Ki Sirdarship) ha ka jingiakynduh kaba kyrkieh kaba la neh palat lai kynta naduh 12 baje nohsngi, ha ka 2 tarik October 2013, ki la ia kynduh halor 1. Ka shithi na ka Ministry of Home Affairs, Sorkar India, kaba D.O. No. 9./10/2012 dated 18 July 2012, sha u Chief Secretary, Meghalaya, kaba pan jingmut halor ka Memorandum ba la phah da ka Dorbar sha ki bor Sorkar India ha u June 2012 2. Ka KHADC Village Administration Bill 2013- Ka jingpynbeit thymmai (Amendment) Sixth Schedule -Constitution Ri India bad ka Rai ka Dorbar 4 tarik June 2013, bad 3. ban kyntu ia ki bor KHADC ban pynjari kyrkieh ia ka AIN bad RULE na ka bynta ki DORBAR KUR ne SENG KUR), bad 4. ban ia kren halor ka jinglong ka suk ka sain hapoh ka jylla kaba la mih na ka jingiakhih jong ki shiphew tylli ki Seng Bhalang.
Hadien ka jingiatai kaba sani bha ka Dorbar ka la rai ban leit ia kynduh ia u Dr Mukul Sangma, Chief Minister (uba la mynjur ban ia kynduh ) lashai mynsngi 3 tarik October 2013, ban ia kren bad kyrpad ia ka Sorkar Meghalaya ban iakren bad ki lai tylli ki bor ADC halor ka shithi kaba la wan na ka Ministry of Home Affairs, New Delhi.
Ka Dorbar ka la rai ban ia kynduh ia u Bah Pynshngain N Syiem, MLA, MDC, CEM, KHADC bad ia ki dkhot jong ka Select Committee KHADC ban ia kren halor ka ain KHADC Village Administration Bill 2013 ba la tyrwa da ki bor KHADC.
Ha ka juh ka por ka Dorbar ki Khlieh Nongsynshar ka la rai ban kyntu ia baroh ki 3367 tylli ki jait Khasi bad Pnar (katkum ka census 1981 lyngba ka kot i Bah Spiton Kharakor) ban lum Dorbar Kur ne Seng Kur kyrkieh ban pynbna (notify) ia ka kyrteng jong kiba la ioh bor ban ai ia ka No-Objection Certificate (NOC), kynthup ka jaka treikam (office) jong ka Dorbar Kur ne Seng Kur, bad ban pyntip sha ki bor KHADC bad bor Deputy Commissioner khnang ba ka nym don kano kano ka jingbakla ha kaba ai NOC na ka bynta ki paidbah ha kaba iadei bad ka jingpan Schedule Certificate (ST) na ka office DC.
Ha kaba iadei bad ka jinglong ka suk ka sain hapoh ka jylla, ka Dorbar Grand Council of Chiefs of Meghalaya ka pynkynmaw ba na ka liang ka Dorbar ha ka 29 October 2012 (mynshymsnem) ki la phah lyngba u nongmihkhmat jong ki u Dr Balajied S Syiem, uba la shah jied ban long u dkhot ha ka HLC Committee, ha kaba la ai ia ka jingsngew na ka liang ka Dorbar ba la donkam ban pyntreikam, pynjanai bad ban pynkhlain ia kiba bun ki Ain jong ka jylla, ki Ain District Council bad ki ain Dorbar Shnong, Dorbar Raid bad Dorbar Hima kynthup ruh ia ka jingdawa ban pyntreikam ia ka Bengal Eastern Frontier Regulation Act (ILP) hapoh ki jaka Sixth Schedule, kum shibynta ban iada ia ka jaidbynriew rit paid.
Ha ka juh ka por ka Dorbar Grand Council of Chiefs of Meghalaya, ka la pynpaw bad kren shai ba khlem ka jingiatrei lang ki bor Dorbar Shnong, Syiemship, Lyngdohship, Sirdarship, Dolloiship, Wahadadar, bad Nokmaship kan long leh noh ei baroh ki jingthmu ban teh lakam ia ka jingwan rung kyrthep ki nongwei. Ki la pynpaw ba haduh mynta ka sngi ki don tang 29 tylli ki Police Stations; 5 Beat House; bad 36 Ops; kiba peit bad khmih ia kumba 3600 tylli ki shnong ha baroh kawei ka Ri Khasi Jaintia Hills, bad kumba tang 19 tylli ki Police Stations; 6 Beat House; bad kumba 30 OPPs; kiba peit bad khmih ia 3000 tylli ki Shnong sha Ri lum Garo Hills.
Ka Dorbar ka pynpaw ba kine baroh ki dei ki kam iing bad baroh ki jingeh ngi dei ban lah ban pynbeit lyngba ka jingiakren, bad dei halor kane ka nongrim ba ka Dorbar Grand Council of Cheifs of Meghalaya, ka la rai ban leit ia kynduh ia u Dr Mukul Sangma Chief Minister, (uba la mynjur ban ia kynduh lashai) ia ka kynhun na ka Grand Council of Chiefs of Meghalaya, lashai mynsngi 3rd October 2013, ban ia kren ia kitei ki phang ba la kdew haneng.(SP News)
