Shillong, Risaw 16: U Chairman jong ka Monolith Festival u Bah Titus Chyne MDC jong ka Sohra bad u bei ruh u MLA, u la ong ba ka jingpynlong ia kane ka jinglehkmen da ka Khasi Hills Conservative Forum (KHCF) ha ryngkat ka jingiatreilang bad ka Khasi Khasi Hills Autonomous District Council (KHADC) ka long ban pynim biang ia ka riti ka dustur jong ka jaidbynriew.
U Bah Chyne u la ong ba kane kam dei ka jingleh tamasa hynrei ka dei ka jinglehkmen ha kaba la khot ia baroh u khun khasi khara ba kin ia poi ha kane ka jinglehkmen namar ka long kaba don kam ban pynneh pynsah ia la ka jong ka riti ka dustur jong ka jaidbynriew.
U la ong ba ka kamram jong ka District Council ka long ban pynneh pynsah ia ka riti ka dustur bad ia ka khyndew ka shyiap bad kane ka dei ka jingkren jong baroh ki kyrtong ha kaba ki leit sha u paidbah ha ka por election. Ha kane ka kynti kaba mynta ka KHADC ka la ioh ia lad ban pynrulong ia kaei kaba ki paidbah ki sngewthuh da kane ka jingleh kmen.
U Bah Allan West Member secretary jong kane KHCF u la ong ba ha kane ka jinglehkmen ym pynia ia ki jinglong tynrai ki khasi naduh ka riam ka beit, ka shad ka kmen ka shet ka tiew bad kiwei kiwei kiba kum ka jaid bynriew ka don.
La ong ba bun na ki jingshad tynrai kila don kiba la sdang ban jah noh, hynrei ha kane ka jinglehkmen kaban long ha ka 25 bad 26 tarik mynta u bnai yn sa pynibiang sha ki paidbah. Ka jingthmu kaba kongsan eh jong kane ka jingleh kmen ka long ban pynsngewthuh sha ki paidbah ba dei ban pynneh pynsah ia la ka jong ka tynrai
Na ka liang jong ka KHCF kaba pyniaid ia kane ka jinglehkmen ka khot ka wer ia ki paidbah u khun khasi khara ba kin ia poi sha katei ka jinglehkmen ban long ka jingpynkhi im biang ia ka jaidbynriew la jong ha ki riti ki dustur. (SP News)
