New Delhi, Jymmang 28: Ka jingmang pisa na ka bynta ka jylla Meghalaya na ka bynta jong u snem 2013-2014 ia kaba la tip kum ka Annual plan ka long T.4151 klur tyngka ia kane la ia mynjur ha ka jingiakren hapdeng u Deputy Chairman, Planning Commission, ka Ri India U Montek Singh Ahluwalia bad u myntri rangbah ka jylla U Mukul Sangma mynta ka sngi ha Nongbah Delhi.
Ha kane ka jingiakren na ka liang jong u Ahluwalia u la ai ka jingiaroh ia ka sorkar Meghalaya ha kaba ia dei bad ka jingpyntrei kamia ki kam pynroiha ka jylla bad ia ka rukom pyndon kam ia ka pisa pilian jong ka jylla. Ha ka juh ka por u la ong ba ka sorkar Meghalaya ka dei ban kham shim khia ha kaba ia dei bad ka jingjur palat ka jingpep skul jong ki khynnah. Haba ia dei bad ka jingpyntrei kam ia ki skhim jongka sorkar pdeng ula ong ba yn sa kham pynkylluid ia ka jingpyntreikam.
Na ka liang jong ka Planning commission ka la thaw ia ka committee kaban peit kyrpang na ka bynta ban pynlait iaka pisa ha ka por kaba biang ia kaba la khlieh da u Under Secretary jong ka planning Commission ban peit tang ia ka jingpynlait pisa ha ka por kaba biang naka bynta ki skhim kiba la beipisa da ka sorkar pdeng. U Ahluwalia u la ong ba ka ioh ka kot ha ka jylla Meghalaya ka la kham kiew ban ia ka ioh ka kot ha ka Ri Baroh kawei.
U Deputy Chairman jong ka Planning Commission ka Ri India u la ong ruh ba ka sorkar Meghalaya ka la dei ban kham shimkhia ha kaba pynkylla ia ka rukom pyniaid haka pule puthi. La ong ba ka sorkar ka dei ban plie ia ka lad ha kaba pyntrei kam ia ki skhim ha ka dur jong ka Public Private Participation ia kaba la tip kumka PPP mode.
La kyntu ia ka sorkar jylla ba kan kham pynkhlian ia ka policy ha kaba ia dei bad ki kam karkhana ha kane ka jylla, ka dei ban pyndon kam ia ki jaka jngohkai pyrthei, ban pyndon kamha kaba kyntiew ia ka ioh ka kot katkum ki juk jingstad kaba mynta. Kaba kham kongsan eh ka long ha ka liang ka ki um kiwah bad dei ban don ia ka policy kaba biang.
Ha ka jingkren jongu Myntri rangbah ka jylla ha kane ka jingialang ula ong ba ka jylla ka la kiew ha ka jingpynmih ia ki marbam mardih hapoh ka plan san snem kaba 11th ha kaba ka jingkiew ka long sha ka 37.68% ban ia nujor bad ka plan san snem kaba 10th kaba long tang 36.86%.
Na ka liang jong u myntri rangbah u la pan ruh ia ka jingkyrshan na ka Planing Commission ha kaba ia dei bad ki skhim sam umbam umdih lyngba ka jingbei pisa na ki bar ri. Haba ia dei bad ki kam pynroi sha ki paidbah hapoh ka Community Development bad Panchajats u la ong ba ka sorkar ka skhim khia bha ia kine na ka bynta ban kyntiew ia ka ioh ka kot jong ki paidbah.
Haba phai sha ka Mining Policy na ka liang jong u myntri rangbah u la ong ba ia kane ka policy la pdiang ha u snem 2012 na ka bynta ban pyniaid beit iaid ryntih ia ki kam tih marpoh khyndew ha ka jylla bad ka sorkar kan pyntrei kam ia ka hapoh shi snem da ka jingiamur jinglut lang kat kum ki ain ki kanoon, la kdew ka lad pathai khubor jong ka sorkar pdeng PIB. (SP News)
