Shillong, K’Lyngkot 18: U Kyrtong ka UDP na Mawlai, u Bah Embhah Syiemlieh haba kren ha ka jingialang iakynduh lang jong ki baroh ki nongkitkam jong ki Unit bapher bapher jong ka seng ha ka thain Mawlai ha ka 18 tarik Kyllayngkot, 2013 ha Mawlaidatbaki kaba long kum shi bynta ka kum shi bynta ka jingialap elekshon u la ong, ‘lada ki lai mawbyrsiew ki iatreilang ryngkat-ryngkat yn ym don jingeh ne diengpyngkiang ki ban khanglad ban poi sha ka thong ka jingjop ba don burom jong ka seng ha ka elekshon ka ban wan”.
U Bah Embhah u la ong “ka jingmut jong ka jingiatreilang synrop kawei kabuit kawei ka bor jong ki lai tylli ki mawbyrsiew ba ban poi sha ka thong ka thew ia ka jingiatreilang naduh ki Rangbah, ki Longkmie bad ki samla. U la ong, kine ki long kita ki lai tylli ki mawbyrsiew kiba long ki paia ba khain ba kongsan bad da ka jingiatreilang kawei hapdeng jong ki, ym artatien ka jingkylla kan wan bad ym artatien ka seng kan sa ioh ka jingjop ba don burom ha ka elekshon ka ban sa long shen ha ka 23 tarik u Rymphang mynta ka snem.
Shuh shuh u Bah Embhah u la ong, “la 40 snem ngi la ioh nongmihkhmat ka thain ka dang sahdien ha baroh ki liang, kumta ka la dei ka por ban ioh noh da u Nongmihkhmat uba dang samla uba lah ban wanrah ia ka jingkylla ia ka Mawlai Constituency. U la ong, ‘nga don ka jingthmu bad ka jingangnud ban saindur ia ka Mawlai na ka bynta ka jingmyntoi u paidbah nongshong shnong ka thain baroh kawei” u la ong.
U la ong, ha kane ka election ka bor jong ka pisa kan trei kam bha na ki kyrtong ki ban iakhun na Mawlai Constituency bad kum ki samla ngi hap ban husiar ban long ki nongpeitngor ym ban shah ialam bakla bd shah pynbiej. U Bah Embhah u la ong ruh ba ka seng congress kumba ka long mynta kam long shuh kum mynshuwa bad ka shu pynbiej ia ki paidbah da ki ‘tien ja-li ja-um bad tang ki kular kai pynbiej.
Haba phai pat sha ki lad jingiarap ha ki kam pynroi ia ka thain kumba la kam da u kyrteng ka Congress uba long u MLA ka thain, u Bah Founder Strong Cajee uba la kam ba u la theh haduh 50 klur ia ka Mawlai Constituency ha ka jinglong MLA jong u, na ka liang u Bah Embhah kane ka long tang ka jingkam lamler, ki paidbah nongshong shnong ki iohi ia kata haba wat tang kawei ka Indoor Stadium ha manla ki dong bad ki shnong ym don satia wat ban pynbha ia kiba la don lypa ruh na ka bynta ki khun samla lem bad kiwei kiwei de hynrei kat shaba ngi leit ngi shu lap beit tang ia ka jingjot rathai jong ki lynti iaid kjat ha ki shnong ki thaw kumjuh ruh ka surok khamtam eh kata ka VIP road.
Na kaliang ka liang u Bah Morris Lyngdoh ha ka jingkren jong u, u la pynshai paidbah ia ki jait scheme bapher bapher kiba ka sorkar kmie ka la bhah na ka bynta uwei-pa-uwei u nongmihkhmat ban kin ai na ka bynta ki paidbah.
Ha ka por ba u MLA jong ka Mawlai u la thung ia nga kum u Co-ordinating Secretary jong ka Mawlai Secretariat nga la khmih lynti ban ioh iarap ia ki paidbah kiba donkam ia ki scheme bapher bapher.
“Nga tip lut ia baroh ki scheme bapher bapher hynrei sngewsynei ia ki minister bad Secretary jong ka Mawlai Secretariat ka dei ka bym don file suda baroh bad la bun bun bnai nga ju kylli na u Bah Founder ba u la ioh ne em ia ki scheme na ka bynta ki paidbah hynrei ka jubab ba nga ioh barabor ka long beit ba “ngin sa ioh” u la ong.
Shuh shuh u la ong ruh ba “hadien ba la mih ka scheme ban sam ia u paidbah ynda nga la wad jingtip bniah bin pa bin nga ioh jingtip pat ba u la seng sa da ka Mawlai People Development Agency (MPDA) bad tang lai ngut kiba don ha kane ka seng hapoh ka jingialam ka jong u kum u Chairman te sa sngewthuh hi ma phi ki paidbah haba u MLA u long Chairman jong kane ka seng shaei ka pisa jong u paidbah kan leit” ong u Morris.
“Dei halor kine kiei kiei baroh ba nga sa mih ban ai ka jingkyrshan ia u Bah Embhah Syiemlieh namar ba nga la iohi ia ka jingtrei kam ka jong u wat tang ha ka bor kaba rit kum u MDC hynrei shibun ki kam u la leh na ka bynta ki paidbah” u la ong.
Ha kaba iadei bad ka jingthied ia ki tin sop iing ne ki CGI sheet ma nga, nga la ioh ban ktah da la ki jong ki kti bad lap katno ka jingstang bad kam iahap shuh ban ong ba ki dei ba pyndonkam ban tap ia ki iing ki sem hynrei ban ker bad tap ia ki sem syiar ne sem sniang u la ong.
Shuh shuh u la ong ruh ba u MLA u thied ia kine ki tin sop iing ha ka dor 2 hajar shiban hynrei ha ka por ba u submit pat ia bill sha ka sorkar ka long haduh 4 hajar tyngka shiban bad kane ka pynpaw ba ym don jingsngew ia kiba duk bad bam ei halade ia kaba bun. Ha kaba iadei bad ka jingsam blanket, u Bah Moris u la ong, ka long kaei kaei kaba sngewsih bad ktah iaka burom ka ijot jong ki nong Mawlai, ki blanket ba la sam da u MLA ki shongdor tang T.350 kawei hynrei u MLA u la kam ba la thied haduh T.1000 kawei. “U MLA jong ka Mawlai u leh eiei ia ki paidbah tang haba ioh jingmyntoi ialade” la bynrap shuh shuh u Bah Morris.
Shuh shuh u la ong ruh ba “Ha Mawlai ngim pat ju ioh MLA ba kum une uba shna surok ba bha tang ha ki kot sada katba lada leit iaid ia ka surok VIP road la lap ba ym dei shuh ban ong ka surok namar ka jingsniew palat” ong u Bah Morris.
