Shillong, Nailar 23: Ka jingpynwai noh ia ka Mawthadraishan BCC da ka Dr. Eureka Lyngdoh, Adhoc President jong ka West Khasi Hills DCC ym lah ban pdiang da lei lei namar ka dei tang ka rai shimet jong ka khlem da khot ia ka Executive Committee jong ka DCC.
Ka Mawthadraishan BCC ka pynshai ba ia kane ka Block la suit lashor da ka AICC ha ka snem 2010 bad ka por jong ka kan kut haduh 2015. Kumno ka lah ban long ba da ka Adhoc President jong ka DCC kaba dang shu shimti kam mynta dang shi bnai haba wat tang ia ka DCC pa pura ruh ym pat lah ban thung, ka lah da kloi ban pynjot ia ki BCC.
Ka Dr. Eureka ka dei kaba dang shu wan rung Party dang khyndiat snem tang ban ioh ticket na ka Congresss ka bym pat da sngewthuh eh ia ka rukom treikam jong ka party Congress bad ka bym pat tip ha kano ka rukom la constitute ia ki BCC kumno kan shu pyndam noh ia ki BCC khlem da iaid lyngba ki kyndon treikam ka Party.
Ha kaba iadei bad ka jingaidaw jong ka Dr. Eureka ba la pynwai noh ia ka BCC namar ba ki don ba la phet seng ha ka election MLA ba la dep, ka Mawthadraishan BCC ka lyngngoh balei ym shim la leh kumjuh ia ka Mairang, ia ka Mawshynrut, Nongstoin bad Rambrai- jyrngam ki ba don hapdeng ka jingkynad bad jingiaphet seng kaba jur ha shuwa ka Election khamtam ka Mairang kat haduh ba la hap ban beh seng noh ia ki 10 ngut ki dkhot ka Executive Committee jong katei ka Block.
kaba pyni ba khambun ki dkhot EC kiba pyrshah ia ka Dr. Eureka ban ia kiba kyrshan ia ka ha ki Election ba la dep. Ia kane ka Block ym shim la pyndam noh hynrei la shu bujli noh da kiwei ki dkhot ha ka jaka kitei kiba la shah beh. Ka BCC Mawthadraishan ka kyntu ia ka Dr. Eureka ba kadei ban thew da ujuh u diengkot ia baroh ki BCC ym ban don ka mynsiem ka jingshah liang.
Ka Dr. Eureka ha ka jingpymih khubor jong ka, ka la ong shuh shuh ba mynta la pynrung biang ia ka Ka Kong Irin hadein ba kane ka briew ka la ialeh pyrshah ia ka party ha kane ka election MLA ba la dep. Ka BCC ka lynngoh kumno ba tang haba pynrung biang ia katei ka briew kaba la phet Party ynda hap ban pyndam ia ka BCC baroh kawei. Don aiu sha lyndet? Balei ba kane ka briew kam wan sha ka BCC ban iakynduh khamtam ia u President ne ki Nongkitkam jong ka BCC khnang ban ioh leh ia kaba donkam. Kumta lada ka Dr. Eureka kam wan ban pynshai ia kane ka kam ha khmat ki dkhot ka Party.(SP News)
