Shillong, Jymmang 08: Ki paidbah nongshong shnong ka Nongrim Jirang, Umkremdykhong bad Jareibasai jan man ka miet ki leit wad ia ka jaid khniang ba la tip kum ka Niangtaser ne ka Niang world Cup kaba mih shisien ha ka saw snem.
Ha kane ka snem ki paidbah ka shnong Nongrim Jirang bad ki shnong ba marjan ki ia mih lang shikmie shikhun na iing ban leit wad ia katei ka khniang ha khlaw hadien ba ki la wan la ka bylla ka nong ne na lyngkha, namar katei ka khniang ka sdang ban mih ha ka por 7 baje mynmiet haduh 2 baje eiei mynstep bad kiba kwah ban iohi da la ki jongki khmat kumjuh ban bam kim banse ban pynshitom ban leit wad mynmiet sha khlaw.
Kiba smat ban trei shitom haduh shi baje eiei ki ioh haduh 2 ne 3 kilo shimiet, kata lada ki ioh ia ka jaka ba ka mih bha kum ha ki jaka ba dei sngi bha bad ba bun siej ka kham mih bha hynrei ki don pat ki jaka ba kam don namar ka rukom mih kam thikna man ka sngi, don ba ka mih bun ha kajuh ka jaka tang shi sngi ar sngi.
Ka doh jong kane ka khniang ka long kaba sngiam bha ban bam lada lah ban pynkhuid bha bad lada kim lah pyntyrkhong ka lah ban sniew noh namar ba ka bun khlein bad um. Shi kilo ki lah ban die ha ka dor T.200 haduh T.250.
U Nongthoh Khubor Peitngor uba la leit sha katei ka shnong ha ka sngi Saitjain ba la dep uba la leit wad Niangtaser lang bad ki paidbah ka thain ula lap ba ka long kaba ishongshit ban leit ban wan wat mynmiet myniong sha khlaw kynhun kynhun kynthup ki rangbah ki samla shynrang kynthei bad ki khynnah ryngkat ki dongmusa ne ki torch light.
Kane ka khniang ka don ia u No-7 ha ka kpoh uwei shaphang ka diang bad uwei pat sha kamon. Mar ia mih na khyndew ka kiew sha ki phlang ki kynbat bad ki dieng ki siej bad tang shu dei lyer kattne katne minit ka pait noh ka sop bad mih da ka kynja khniang lung ba don sner bad hadien khyndiat por pat lada ym ioh ban pyniap ka heh noh bad kylla dur sha kaba kham iong ban pyni ba ka la kham iaw bad ban bam ruh kam da shngiam shuh lada ka la heh.
Ka mih bha ha por ba rang ka mariang katba ha ka por slap kam da mih bun bad lada ka mih ruh ka slem ban mih na ka sop jongka namar ba ka jhieh. Ka la mih ha ka thain Jirang la palat 2 taiew eiei bad ka dang mih haduh kine sngi ruh, la iathuh ki trai shnong.
Kane ka jaid khniang kaba syriem ia ka Niangkongwing ym ju kham bna khoit ba ka mih ha ki kiwei ki jaka ha ri lum Khasi-Jaintia lait tang ha Ri Bhoi bad ha Ri Bhoi ruh ka kham mih bha ha ki thain ri Bhoi sepngi ha ki jaka ba long khlaw.(SP News)
