Shillong, Kyllalyngkot 19: Ka Nangkiew FC ‘A’ ka la rah ia ka nam ha ka lympung ialehkai 4th Inter Dong Football Tournament ba la pynlong da ka Mawlai Umjapung Sports Club, hadien ba ka la pynliem noh ia ka Nangkiew FC ‘B’ da 2-1 kol ha ka sngi Saitjaiñ ha madan Umjapung.
Kane ka jingiakhun ka la long kaba itynnad bad kaba iakhaid bha naduh kaba sdang ka jingialehkai ha kaba ki la iakhun tyngeh na ka bynta ban khur ia ka jingjop. Watla kine ki kynhun kiba dei na kajuh ka dong, ki la iakynduh final, hynrei ki la lah ban pyni ia ka mynsiem iakhun bad ban pynhun ia ki paidbah.
Ha ka kylla step ka Nangkiew FC ‘A’ ka la pynkhih jar nyngkong eh, hynrei ka Nangkiew FC ‘B’ ka la lah ban pyniakhaid kylla bad haduh kaba kut ka jingialehkai kine ki kynhun kim shym la lah ban pynurlong ia ka jingjop.
Te kumta na ka liang ki bor pyniaid ki la pyniakhun biang ia ka ‘extra time’ kaba mar shiphew minit bad dei hangne ba ki rangialehkai ka Nangkiew FC ‘A’ ki la thep biang ia ka kol kaba ar bad khur syndon ia ka jingjop.
Ia ka nam Top Scorer la iohpdiang da ar ngut ki rangialehkai kata u Testbor Thabah uba la thep san kol ha kane ka lympung bad u Badondor uba la thep lai kol. Ka nam Best Goalkeeper ka leit sha u Moodifield Lyngdoh, Best Player sha u Filbert Lyngdoh, Youngest Player ka leit sha u Paul Lyngdoh.
Ha kane kajuh hi ka sngi la sam ruh ia ki khusnam kiba kyrpang sha ki hynñiew ngut ki khynnah samla kiba la pass bha ha ki eksamin SSLC bad CBSE jong u snem ba la lah.
Ia kitei ki khusnam ka sam da u MLA/MDC ka Mawlai Constituency Bah Embhah Syiemlieh uba long u kongsan, kumjuh ki sumbud kongsan kiba long ki kyrtong ban iakhun ha kane ka ilekshon MDC ka ban sa sdang shen, kiba kynthup ia u Babu Gervasis Kharmujai (United Democratic Party), Bah Panbor Lyngdoh Ryntathiang (HSPDP), Bah PT Sawkmie (KHNAM) bad u Bah Teibor Pathaw.(SP News)
