Shillong, Nailur 17: Ki sengbhalang jong kajylla hadien ba kila iohpdiang ia ki jingkyrpad na kiba bun balang kila pynjynsur noh ia ka Pakhang Shnong ne ka Bandh sha ka 12 kynta kaban long ha ka 20 tarik mynta u bnai.
U Vice President ka KSU u samla Fredrick Kharmawphlang ula iathuh ba kane ka Pakhang Shnong kan sdang noh naduh ka por 5 baje mynstep ha ka 20 tarik bad kan kut noh ha ka por 5 baje janmiet ha kane ka juh hi ka sngi.
Kumban shu pynkynmaw ki sengbhalang kila pynbna ban pynlong ia ka Pakhang Shnong kaba 24 kynta ha ka 20 tarik ha akba yn sdang nadoh ka por 5 baje mynstep bad kan kut pat ha ka sngi babud ha ka por 5 baje mynstep.
Une u nongialam ka KSU ula ong ruh ba ha katei ka sngi kin don ki jingkyntiew kurim bad la kyrpad ia kito kiba leit sha ki jingkyntiew kurim ha ka por mynsngi kidei ban pynithuh da kaba teh da ki balloon bad ula kyntu ruh ia ki paidbah ka bri u Hynniewtrep ban iai shah shitom bad ban iasnohktilang met bad mynsiem na ka bynta ka jingmyntoi ka mynta bad ka lashai.
Shuh ula ong kaba la pynlong ia ki sengbhalang ban iakhih kadei namar ka jingpynbor ka sorkar kaba kuman bad leh kyllut ia ka jingdawa na ka bynta ka jingshngain jong ka jylla hi baroh kawei bad wat sngewthuh bakla ne shah ialam bakla namar ka sorkar hi ka pynbor ban iakhih.(SP News)
