Shillong, Risaw 15: Ki 13 tylli ki sengbhalang jong ka jylla kila iakynduh hynne ka sngi bad kane ka kynhun da kawei ka sur kila rai ban iengskhem beit ha kajuh ka nongrim ban dawa na ka sorkar ban pyntreikam ia ka Inner Line Permit (ILP) ha ka jylla bad hakajuh ka por kila rai ban pynlong ia ka Pakhang Shnong ne ka Bandh kaba 24 kynta.
U Vice President ka KSU u samla Fredrick Kharmawphlang ula iathuh ba kane ka Pakhang Shnong kan sdang ha ka por 5 baje mynstep jong ka 17 tarik bad kan kut pat ha ka por 5 baje mynstep ha ka 18 tarik mynta u bnai.
Une u nongialam ula ong ruh ba ki 13 tylli ki sengbhalang ki pynrem jur ia ka jingkem pathar bad jingkynnoh klumar ia ki dkhot jong ki sengbhalang ha kaba katba don ki jingjia kila shah kynnoh bad kila kylla sohpdung bad ia kum kine kiei ki jingkynnoh bad jingkem pathar yn ym lah ban pdiang satia.
Shuh shuh ula ong ruh ba kala don ka jingjia ha kaba la kem ia ki ar ngut ki bar jylla na Nongmensong bad hadien ka jingshah kem kine ki bar jylla kala kynjah bad kam shym la don shuh kano kano ka jingjia bad kane ka pynishai ba ki don bun bah ki nongshimkabu tang ban pynthohbria ia ki sengbhalang bad ban pynkit pap ia ki dkhot jong ki sengbhalang.
“Kaba sngewsih ka long ba kine ki bar jylla kiba la shah kem kila lait noh, hynrei haba kem bad iohbat pat ia ki dkhot jong ki sengbhalang la pynngat ia ki ha ki kyndon ain bapher bapher bad pharep ba kila donkti ha ki jingjia ki bapher bapher bad ki sengbhalang kin ym lah ban pdiang da lei lei ruh ia kane, namar ka pawshai ba kadei ka jingthombor im im peit peit ia ka hok longbriew manbriew ia kiba dawa ia ka hok jong ka jaidbynriew” la ong u samla Fredrick Kharmawphlang
Une u nongialam ula pynrem jur ruh ia ka jingkem bad ka jingkynnoh jong ki pulit ia u Eldie N Lyngdoh u Information & Publicity Secretary ka FKJGP, ba ula donkti ha kaban kawang petrol bomb ia ka puja pandal ha Umsning, bad ula ong ruh ba kane kadei tang ka jingpharep jong ki pulit ka bym shym la don nongrim hangno hangno ruh bad kadei tang ka buit jong ki pulit ban kem ia u ban pharep halor katei ka jingjia bad ula ong ruh ba jingshah kem bad ka jingshah kynnoh ki dkhot ki sengbhalang baroh shi katta kala nang ai ding shuh shuh.(SP News)
