Jowai, Kyllalyngkot 24: Ka jingkhot pakhang surok miet ba la khot pynlong da ka AJYWO Sengkmie, KSU-JHDU, FKJGP-Khliehriat Circle bad HNYF-East Jaintia Zone ha ka 27 bad 28 tarik mynta u bnai naduh 7 baje janmiet haduh 5 baje mynstep ha baroh artylli ki district ka Jaintia Hill kan iaid beit kat kum ba la pynbna naduh mynshuwa ban pynbor ia ka sorkar ban maramot noh ia ka surok National Highway 44 naduh Mookyndur haduh Malidor.
Kane ka jingkhot pynlong ia katei ka pakhang surok miet da ka AJYWO, KSU, FKJGP bad HNYF ka la ioh ruh ia ki jingkyrshan ki ba bun na u paidbah jong ka Ri Lum Jaintia.
“Katkum ba ka long mynta, ka bynta jong u NH 44 kaba hap naduh Soomer West Jaintia Hills haduh Malidor East Jaintia Hills, ka la long kum ka surok khlem trai shuh. Ym don shuh ba don ia ka jingkitkhlieh ia katei ka bynta jong utei u surok mynta. Ka PWD (Rds) Central Division, Jowai ka kynnoh ia ka National Highway Authority of India (NHAI), ka NHAI ka kynnoh ia ka Simplex Infracture bad ka Simplex infrastructure ia ka PWD bad ruh ia ka NHAI.” Ong u Bah MH Dkhar President ka AJYWO Sengkmie lyngba u kyrwoh khubor.
“Kane ka jingiakynnoh iwei ia iwei pat ka la pynlong ia kitei baroh lai tylli ki bor ban iehnoh khunswet ia katei ka bynta jong ka NH 44 bad ki ba la shitom mynta ki dei ki paidbah nongleit nongwan langba katei ka surok. Wat ki bynta jong ka NH44 ki ba naduh Soomer haduh Mookyndur ruh ki ba dang dei ban peit ban sumar da ka PWD mynta la shu ieh bein kumto da ka tnad PWD jong ka sorkar jylla. Kane ruh ka la ktah ia ka iaid ka ieng jong ki paidbah.” La bynrap shuh shuh u Bah Dkhar.
“Ngi burom ia ka jingkyrpad jong u DC ka East Jaintia Hills District ban weng noh ia kane ka pakhang surok miet hynrei ngim ban se pat de ban iaid sha khmat na ka bynta ka bha ka miat jong u paidbah namar wat haduh mynta la bun sngi ba ngi ba la pynbna ia kane ka jingiakhih, ka sorkar kam pat shym la maramot ia katei ka surok.Ka ba i sangsot ka dei ba satang katno bnai eh ka por lyiur kan sa wan bad ynda u slap un wan, u paidbah un sa hap ha ka jingjynjar bah ha ka iaid ka ieng lyngba ka surok NH44” ong u Bah sa u bah WT Rymbai President ka FKJGP-Khliehriat Circle.
“Nalor ka jingshitom ka leit ka wan ba sniew palat u tei u surok ha Jaintia Hills hynrei ki paidbahnaduh ki nongleit nongwan haduh ki nongshongshnong, mynta ki bam da ka tdem pum pum bad ka jakhlia. Ym tang ki paidbah hynrei wat ki pulit ba pli ruh kiba ia leh shitom miet la bad sngi ban pyniaid ia ka traffic wat hapdeng ka jingsniew palat jong katei ka surok bah” ong shuh shuh u Bah SS Niangti General Secretary ka KSU-JHDU.
Ngi kyntui a ki paidbah jong ka jylla Meghalaya bad ruh jong ka North East India hi baroh kawei ban ai iaka jingkyrshan ia ngi ha kitei ki armiet khnang ba ka sorkar kan sngap ia ka jingdawa jong ngi ban pynbha wut wut ia baroh ki bynta jong utei u surok ki ba la sniew palat bad ruh kiba la ktah ia ka leit ka wan jong u paidbah” pynkut u kyrwoh na u Bah Julius Nongtdu, President ka HNYF-EJZ.(SP News)
