Shillong, Naitung 25: ha ka jingkren ia lang paidbah kaba nyngkong na ka liang jong u Lat ka jylla u Dr KK Paul ha dien ba u la shimti kum u Lat ka jylla Meghalaya u la ong ba ka rai ka par ka dei ban iaid ryngkat ryngkat bad ka jingiada ia ka mariang.
U la ong “ ki briew jong ngi ki sha niah ha ka mariang na ka bynta ba kin im khlem da ktah ia ka” hynrei da ka jingkylla ka jingwan jong ki karkhana ka rukom pyrkhat ia ka mariang kumba ka long mynshuwa mynta ka la sdang ban jah.
Ia kane u Lat ka jylla u la kren ha ka jingialang kaba la pynlong da ka Citizens’s Conference halor ka Mariang bad kumno ban pynneh ia ka kaba la pynlong da ka ICARE ha ka jingiateilang bad ka tnad sorkar Meghalaya Institute of Governance, Government.
Ka jingwan jong ka roi ka par ka la kyntiew iaka long briew man briew ha ka juh ka por ruh don bam ban pynneh pynsah bad sumar ia ka kane ka long kawei ka bynta kaba don kam, ka roi ka par ym dei ban pyniakhlad na ka jingiada ia ka mariang ha kaba kine ki hap ban iaid ryngkat ryngkat.
Na ka liang jong u Principal Secretary u K S Kropha u la ong ba ka long kaba don kam ban ia kren ha kaba ia dei bad ki ain kiba ka sorkar ka thaw bad ki riti ki dustur kiba don pan peit ba kin ear kim dei ban ia tyngkhuh kawei ia kawei pat.
Ha kane ka sngi kiba la poi sha kane ka jingialang ki long ki heh sorkar, ki nongkit kam shong ki sengbhlang bad bun ki riew rangbah kiba ieit ia ka mariang.(SP News)
