Shillong, Nailar 07:ka seng Meghalaya People’s United Front (MPUF) ka la ong ba lada ka sorkar ka don shisha kata ka jingkitkhlieh na ka bynta ki samla pule jong ka jylla ka jingkylli ka long balei ka sorkar kam shym la siew ia ka bai bam jong ki samla pule.
Haba kren ha ki nongthoh khubor mynta ka sngi u General Secretary jong ka MPUF Bah Aimonbha Syad u la ong ba lyngba ka Right to Information (RTI) kaba ki la ioh na ka Directorate of Higher bad Technical Education (DHTE) ka la pynishai kdar ba ka sorkar pdeng ka la dep ai T.13.59 crore sha ka jylla Meghalaya ban siew ia ka bai bam jong ki khynnah pule.
Baroh ki kynnah pule ki don 70,521 ngut kiba pule ha ki 163 tylli ki colleges na ka bynta jong u snem 2011-12, na kine kiba la ioh ki long tang 61, 706 kat ba ki 8815 ngut haduh mynta kim pat ioh bad ki dang ap ia kane ka bai bam jong ki.
Ka long kaba phylla ia kane ka sorkar jylla Meghalaya wat la ka sorkar pdeng ka la dep ai ia katei ka pisa hynrei kam shym pynlait pat ia kane ka pisa kaba dei jong ki khynnah, la ong u bah Syad. Ka long kaba lyngoh ba kito ki samla kiba don ia ka account jong ki bad ka SBi ki la dep ioh bad kito kiba don bad ka MCAB lane bad ka MRB haduh mynta kim pat iohi.
Na ka liang jong u president ka MPUF u bah Diwanmi Laloo u la kynnoh ba kane baroh ka paw shaikdar ba wat ia ka pisa jong ki samla pule ruh la ia bam sap lada kam dei kumta shaei ka pisa ka don dei ban siew noh ia ki khynnah.(SP News)
