Shillong,Jymmang 05: Hadien ba ki pulit ka Nongbah ki la kem ia u President ka seng u Bah Lamphrang Kharbani bad ia ki saw ngut katba ki dang wan na Rangthong,ka seng Hynñiewtrep A`chik National Movement (HANM) ka la pynpaw ba kam ju don satia ka jingiadei bad ki seng kieng atiar.
U Bah Damonmi S. Dkhar, General Secretary ka Seng, haba kren bad ki lad pathai khubor khubor u la ong,“ka jingkynnoh jong ki pulit ba u Bah Lamphrang u la hiar sha Bangladesh ka long ka bym don nongrim ei ei ruh em namar ha ka 1 tarik,mynta u bnai, u Bah Lamphrang u dang iadon lang ha Hotel Assembly ha ka Central Executive Committee jong ka Seng bad ula ia don ryngkat lang bad ki haduh da miet.
Na ka liang ka seng ha kaba ia dei bad ka jingkhot pakhang ophis da ka Seng HNLC ka ban pynlong ha ka 9 tarik,12 tarik bad ha ka 13 tarik mynta u bnai ka seng kam ia don bynta ei ei ne ban ai jingkyrshan ia ka seng HNLC bad ka seng haba ka don kano kano ka jingdonkam jong ka ki ju leh hi.
Ha kaba ia dei bad ka ka jingioh kurup ki pulit ia ka shithi dawa jong ka seng HNLC na ka met jong u president na ka liang jong ka seng kin sa pynlong ka jingtohkit kaba bniah ia u President ynda u la lait na phatok namar bunsien kum ka seng ka ju lap ia ki pulit ki ju pharep kulmar ia ki nongialam jong ki sengbhalang bad lada ka seng ka lap shisha ia ka jingiadonkti jong u president bad ka HNLC, kin weng beit mardor na ka shuki kaba u bat bad tait seng syndon ia u,” la ong u Bah Dkhar.
Kane ka dei ka sien kaba lai ba u Bah Lamphrang un shahkem ha ki pulit. Ha u Naiwieng 2012, u Bah Lamphrang u la shahkem halor ka jingthied be-ain ia kawei ka pistol 7.65 ba la pyndonkam da ki saw ngut ki snar lute ha National Highway.
Ia kane ka pistol u la thied na u Bah Pynshai Rani ha ka dor T. 40, 000 hajar ia kaba ki pulit ki la ioh kurup na ingsah jong u na Mawkasiang ryngkat bad hynriew tylli ki kuli. Ka jingshahkem kaba ar ka long halor ka jingkynnoh ba u la byrngem ia kawei ka longkmie ha ka 3 tarik, Naitung, 2013 bad lait jamin noh ha ka 14 tarik, Nailar, 2013.(SP News)
