Shillong, Kyllalyngkot 28: Ka Silver Lee FC ka la long ka lahduh ha ka jingialehkai kynjat ball kaba la long mynta ka sngi ha Mawlai Umthlong ia kaba la pynlong da ka seng kur Mylliemumlong.
Kane ka kynhun ialehkai kala ioh ban rah ia ka khusnam kaba T.20 hajar lem bad ka Trophy hynne ka sngi hadien ba ka la lah ban pynliem noh da 1-0 kol pyrshah ia ka Nongumlong FC ha ka 1st Knockout Football Tournament ba la pynlong da ka Seng Kur Mylliemumlong, Mawlai Umthlong.
Ka Nongumlong kaba la wan ba-ar ka la ioh rah ia ka song T.10 hajar lem bad ka Trophy.
Ha kane ka lympung, ki don 32 tylli ki kynhun ialehkai kiba la wan iashim bynta.
Ha ka jingiakhun phainal kaba la long hynne ka sngi, ka Silver Lee ka la iohrah ia kane ka nam lahduh hadien ba ka lah ban ioh pynkhih ia ka jar ha ka jingiakhun jong ka kylla step.
Ia kane ka tournament la pynhap pyrda noh da u Bah Embhalang B. Syiemlieh, MLA/MDC ka Mawlai Constituency, uba la long u Kongsan ha ryngkat ka jingiadon lang u Bah Gervasis Kharmujai, kyrtong MDC ka UDP na Mawlai Constituency, u Bah Joe Marbaniang, u Bah Hunter Mylliemumlong, uba long u :President ka Kur Mylliemumlong bad ki nongkitkam ka Kur kynthup ia ki paidbah kiba la wan ban sakhi ia kane ka sngi.
Ia ka khusnam Best Player la iohrah da u samla Bansuklang L. Nongbri, na ka Silver Lee FC, Top Scorer la iohrah da u samla Sanborlang Lyngdoh na ka Nongumlong FC bad ia ka nam Best Goalkeeper la iohrah da u samla Sunshine Kharumnuid na ka Nongumlong FC.(SP News)
