Shillong, Jylliew 11: Ka the Meghalaya Health Insurance scheme(MHIS) ka dei kaba la shuh pynkylla kyrteng na ka skhim Health Insurance jong ka tand labour jong ka sorkar pdeng ia kaba la tip kum ka RSBY.
Kumba ka paw na ka MHIS Disease Package Rate, ha kaba website jong ka tnad ka koit ka khiah ka kyntien MHIS kam don hynrei ka don ka kyntien RSBY. Ha kane la don lut baroh ki jaid jingpang kaba ka RSBY kan siew lada ki nongpang kin leit ban shah sumar ha ki hospital.
Ha kane ka MHIS Disease Package Rate la dep ban buh lypa ia ka dor na ka bynta ki jaid jingpang kiba ha rukom kaba ka company kan siew lada palat na ka jingbuh dor jong ki u nongpang u hap ban sei na la ka pla, kum ka nuksa lada ia u nongpang la hap ban buh ha ICU ka dor ka long T.1000/- shi sngi, lada u briew u lait ka motkhohsiew ka jingsiew ka long T.1100/- tyngka , la da phah phut bniat ka jingsiew ka long T.200/- bad kumta ter ter la buh la ka jong ka jong ka dor.
Na ka liang jong ka sorkar Meghalaya ka la buhrieh ia kine ki jingbuh dor na khmat ki paidbah, hynrei ha ki jingpynlait khubor jong ka la pynkmen ia ki paidbah ba kin ioh ia ka jingsumar kaba T.1.6 lak na ka bynta shi snem na ka bynta san ngut na kawei ka iing.
U myntri ba dei peit ia ka tnad ka koit ka khiah u bah AL Hek haba kren ha ki nongthoh khubor u la kumbur ba ka don ka jingdkoh ha kaba pyntrei kam ia kane ka skhim dei na kata ka daw u la btah ia ki briew jong ka MHIS ba kin ai ia ka kaiphot sha u na ka bynta ban bishar bniah ia kane ka skhim khnang ba ki paidbah kin nym ngat ha ka jingeh kumba ka la jia ha kine ki ar sien kiba la dep.
Na ka liang jong u shimet pat u la ong ba kane ka dei ka skhim jong ka sorkar jylla, kam dei ban don ka jingbuh kyndon ne buh dor ka dei ban long beit T.1.6 lak ka jingsumar ia kano kano ka long iing kaba don ia kane ka Cards, balei kan da don ka jingbuh dor. Ha ka jingsngewthuh jong shimet ka long ba imat la shu but ia ki kyndon jong ka RSBY.
U la ong ba ia kane ka kam ym sa ia kren bad u myntri rangbah ka jylla na ka bynta ban pynbeit ia ki jyrwit jyrwat na ka bynta ka jingmyntoi jong ki paidbah. Hynrei na ka liang jongu myntri u la kiar ban jubab ia ki bun ki jingkylli da kaba u ong ba ynda u la ioh ia ka kaiphot yns a lah ban ai ia ka jubab kaba shai ha kaba ia dei bad kane ka skhim.(SP News)
