New Delhi Iaiong 18: Ka Asian Centre for Human Rights (ACHR) mynta ka sngi ka leit ban ai ia ka dorkhas sha u president jong ka Ri India Pranab Mukherjee ban dawa na u ba dei ban wad ki lat ki lynti kumno ban pynduh noh ia ka rai pyniap da kaba shi sdien phasi ia ki nongleh kam sniew.
Na ka liang jong kane ka seng kaba dei peit ia ka hok long briew man briew ka kyntu ia ka sorkar India ba ia ki briew kiba la rai pynrem da ka iing bishar ym dei ban sdien phasi ia ki hynrei dei ban shu set ia ki hapoh along baroh shirta jingim.
Haba ia dei bad ka jingshah rai pyniap jong u Devender Singh Bhullar na ka liang jong ka ACHR ka la ong ba ki don ki bynta kiba u president jong ka Ri India mynshuwa u la shah ba u briew yn pan map ar sien na u president.
Ka ACHR ka ong ba ka sorkar India lyngba u president jong ka Ri India ka la dei ban shu set along shitra jingim ia u Devender Singh Bhullar u ba ka iing bishar ka la rai pynrem. Lada ia u Das na ka jylla Assam la lah ban shah ban pan map ar sien kaei ka jingeh pat ia u Bhullar.
Kumba ka long mynta bun na ki paidbah nongshong shnong jong ka Ri India kim kwah ban iohi ia kane ka rai pynrem ia ki nongleh kam sniew da kaba shu sdien phasi, wat la ki la leh ia kam sniew ha dien ba la rai pynrem dei ban set ia ki shirta jingim ha poh phatok.(SP News)
