Shillong, nailur 23: U myntri rangbah ka jylla u Dr Mukul Sangma ha ka jingkren ka jong u ha ka jingialang kaba la long ha ka Nongbah Delhi, halor ka phang “National Integration” u la ong ba ka sorkar ka la kut jingmud ban pynneh ia ka shong suk shong sain ha ka jylla hapdeng ki jaid bynriew baroh.
Na ka liang jong ka sorkar Meghalaya ka pynrem jur ia ki jingiakhih pyrshah hapdeng kawei ka jaidbynriew ia kawei pat. Kine ki nongpynthud ia ka shong suk shnongsain ki trei bor bah ban pynthud ha kaba ia dei bad ka jingkiew ha ka ioh ka kot. U la ong ba um dei ban ailad ia ki briew kiba ialeh ban ialam bakla ia ki khun samla.
Ha kaba pynneh pynsah ia ka jingshong suk ym dei ban buh ia u dak jingkylli hynrei dei ban ialeh ban pynneh pynsah ia ka jingshong suk shongsain hapdeng ki jaid bynriew baroh ka long ha kano kano ka rukom. “ Nga long u nong India ym ba nga but ia kano kano ka niam hynrei nga dei u nong India lada ngam dei u nong India nga dei u ei pat ?”
U Dr Mukul u la ong ba wat ki lad pathai khubor ruh ym lah ban shu leh klet ia ki ha kaba ki pynmih ia ki khubor pyniashrud para briew, hynrei ka dei ka kamram jong ki lai pathai khubor ba kin toh ia ki jingjia da kaba ieng pdeng da ka jingkit khlieh khlem da ialam bakla ia ki paidbah da kano kano ka jingthmu, namar bun sien tang na ka jingthoh ha ki lad pathai khubor ka wanrah ia ka jingiashrud.
Haba ia dei bad ki lad phah jingtip lyngba ki social media, ki la don ki ba la pyndon kam bakla ia ka bad kane ka long ka jingma haba la pyndon kam bakla da ki briew kiba kwha ban pynthud ia ka shong suk shongsain.
Na ka liang jong u Dr Mukul u la kdew ba bun sien ka jingslem ban phah ia ki kynhun pulit na kawei ka jaka sha kawei pat ka wanrah ia ka jingeh namar katban da poi ka jingiakynad ha madan ym lah shuh ban tem. U la kyntu ba lada long kaba lah dei ban pynkloi ban phah ia ki shipai mar ia pan ki sorkar jylla.
Ha kine ki sngi la iohi ba ki la don ki jingdawa ban ioh jylla ka la jong ha kane ka ri, kiba la pynlong ban don ki jingiakhih bad kane ka long katkum ka jingdon jong kita ki paidbah nongshong shnong. Kane ka la wanrah ia ka jingbym sngew shngiam bad lada kane ka neh haduh ka election Lok Sabha ban wan kin sa don ki seng ki ban shim kabu , u la ong ba ka dei ka kamram jong ki National Party ba kin kdew lynti ban kiar na ki jingiakhih ban nym ailad ia ki seng rit ba kin khih.
Ha ka jylla Meghalaya ruh ka dong ka jingdawa ban ioh ia la ka jong ka jylla Garo ha ki bynta jong ki Lum Garo, kane kam dei ka sien kaba nyngkong hynrei ka dei kaba la don labun bun snem mynta bad ka sorkar ka la shim ki lad ki lynti kumno ban tem ia ka namar kane ka don ka jingiadei ruh bad ki kam lehnoh.
Ka jylla kumba ka long mynta ka don ka jingdawa ban pyntreikam ia ka Inner Line Permit (ILP bad ki briew kiba dawa ia kane ki la pynlong ia ki jingiakhih hynrei na ka liang jong ka sorkar ka la ieng skhem ban ia leh ia kane bad ka sorkar ka la pynshai sha ki paidbah ia kane lyngba ki lad pathai khubor.
Haba ia dei bad ka jingiada ki kynthei na ka liang jong ka sorkar ka la shim ia bun ki lad ki lynti da kaba buh ia ki pulit kynthei ha ki thanat. Ban wad ia ki khynnah bad ki ain bapher bapher ba ka sorkar jylla ka la leh ban iada ia ki kynthei khynnah.
Na ka liang jong ka sorkar ka la shim ruh ia ki lad ki lynti kumno ban iada ia ki rit paid ha ka jylla, wat la ka jylla Meghalaya ka dei ka jylla ba don bun ki rit paid. (SP News)
