Shillong, Risaw 10: ka myntri kam poh iing ka jylla ka kong Roshan Warjri ka la ong ba ka sorkar ka la shim ia ki lad ki lynti kumno ban pynkhlian ia ki lad ai jingiada ha kane ka lehniam Durga Puja ban peit ba kin riew shim kabu kin nym ioh lad ban pynit ia kane ka jinglehniam ha ka jylla baroh kawei.
“Ngin leh da kaba tyngeh ia kito baroh kiba ialeh pyrshah bad pynthud ia ka jingleh niam puja bad ngi la pynkhlain shuh shuh ia ki bor pahara da ka iasnoh kti lang bad ka tnat Home guard khnang ban ioh ia ka Durga Puja ka basuk basain jong ki paid riew ngeit Hindu,” la ong ka Kong Roshan Warjri ka myntri bapeit ia ki kam pohiing sha ki lad pathai khubor hynne ka janmiet ha ophis treikam ha Secretariat.
Ka sorkar ka kyrpad ruh ia ki paid nongshong shnong baroh ba kin kyrshan ban iasnoh kti pura bad ka sorkar namar kiei kiei baroh ki la long jai jai ha baroh ki district ha ka jylla baroh kawei bad kano kano ka jingpyrshang ban hiarthma bad pynthud, ki bor pulit ki la peit bniah bad kin leh da kaba tyngeh ia kiba donkti baroh.
Ki pulit ki don hapoh ki jaka pyniaid jong ki baroh 24 kynta bad la buh ruh ia nongpahara kiba ha ka uniform bad khlem uniform ruh kumjuh ha kylleng ka nongbah bad lada don kano kano ka jingsuba sniew ki lah ban pyntip sha ki. Bynrap shuh ka Kong Warjri.
Ka myntri kam poh iing ka la ai jingiaroh ia ki seng bhlang ba ki la buh teng ia kane ka jingiakhih ka jong ki ha kane ka por lehniam puja. Na ka liang jong ka mytnri kala ong ba kane ka jingpahara kam long ym tang ha kane ka jinglehniam puja hynrei wat ha kiwei kip or ruh kum juh ba don kano kano ka jinglehniam da ki jaid niam bapher bpaher.
Na ka liang jong u SP jong ka East Khasi Hills u la ong ba ki paidbah ki dei ban husair na ki lad pathai khubor kiba lah ban wanrah ia ka jingkhih win namar bun sien ki riew shim kabu kin pyrshang ban wad ia ki lad ki lynti kumno ban leh ban pynthud ia ka shong suk shongsain. Na ka liang jong ki pulit kin leh da kaba tyngeh ia kum kine ki briew.
U Deputy Commissioner jong ka East Khasi Hills u Sanjay Goyal haba ai jingkren u la pynpaw ba ki bor synshar district ki ladep pynlong ia ki jingialang bad ki bor shnong jong ki shnong bapher bapher ha ka ban iarap ban peitngor lem ban pynlong ia ka puja kaba suk basain.
Ha kane ka por ba ka myntri kam poh iing ka kren ha ki nongthoh khubor la donlang ruh ki heh jong ka tand kam poh iing ka jylla u K S Kropha Principal Secretary , u Superintendent of Police jong ka City u Bah Vivek Syiem, u SK Raju bad u DGP u Bah P J Hanaman.(SP News)
