Shillong, Nohprah 10: Kum shibynta ban rakhe ia ka sngi burom ka lyngkhuh snem ba hynriew-phew san jong ka Jingpynbna-ïar Satlak ïa ki Hok Longbriew Manbriew (Universal Declaration of Human Rights) ba la pynbna ha ka 10 Tarik u Nophrah 1948 ha shityllup ka pyrthei kaba la pdiang bad pynjari da ka Dorbar Bah (General Assembly) Balai jong ka Synjuk Ki Ri (United Nations), Ka Meghalaya Peoples Human Rights Council(MPHRC) ka ong ba kane ka jingpynbna- ïar ka pynkup bor ha man uwei pa uwei u briew ïa kita ki hok tynrai kiba dei ban ïoh salonsar. Dei halor kane ka nongrim ba la pruid dak bad thoh ïa ki lai-phew tylli ki jait hok kiba la bynta ha ki jenis jong kane ka Jingpynbna-ïar. Kaba sngewsih ka long ba wat haduh mynta ki jingpynkhein ïa kita ki hok ki nang iai jia ha kylleng ka pyrthei bad wat ha kane ka jylla Meghalaya ruh.
Ka jingiaksaid ban iada ban kyntiew bad pynneh pynsah ïa ki hok tynrai jong ki paid trai ri trai muluk ka dei kawei na ki mat kiba sngewkhia bad kiba la iatai sani bha ha kylleng ka pyrthei. Haka ban pynpaw ïa ka jingkyrshan bad jingsngewlem ïa ki jingiakhih halor ban dawa bad ban pynioh ïa ki hok tynrai jong ki paid trai ri trai muluk kane ka jylla, ka MPHRC ka pynpaw ïa ka jingsngewkhia kaba khraw halor ka jingmynthi bad ka jingkuman ka Sorkar kaba la ialeh pyrshah bad ïuhroit kylla ïa ka sur u paidbah pynban haka jaka ban wad da kiwei pat ki lad ki lynti ha ka ban ai ïa ki jingiada kiba kyrpang ïa ki hok jong ki paid trai ri trai muluk ban teh lakam ïa ka jingwan rung kyrthlep bad taplup jong ki mynder” ong u Bah Dino D. G. Dympep Chairman ka MPHRC.
Ym lah ban len ba ha kine ki sngi ba la leit ka jylla ka la sakhi ruh ïa shibun ki kam thombor bad jingshah ïuhroit ïa ki Hok Longbriew Manbriew bad haba shim khia ïa kine ki kam thombor kum ki paidbah ngi dei ban ai ïa ka jingpynrem kaba jur ïa ka Sorkar Jylla namar ka jingbymlah ban teh lakam ïa kine ki kam thombor bad ka jingbymlah ban pynïoh ruh ïa ka jingbishar ba shong hok. Kine ki jingshah ïuhroit ïa ka Hok Longbriew Manbriew ki kynthup ïa ka jingkem pathar bad jingpynshitom be-ain da ki bor pulit ïa ki briew ba lui lui ha ka kyrteng jong ka jingsuba, ka jingïap ki koidi ha along, ka jingshah pynïap klep ha ki bor pulit, ki jingshah rahbor bad jingpynïap ïa ki briew da ki kynhun lehnoh kynthup ka jingshah lehbein bad jingshah ïuhroit khamtam eh ïa ki hok jong ki kynthei bad ki khynnah rit da ka jingjyllei jong ki kam leh beijot kiba dang iai jia haduh kine ki sngi. Ka Sorkar ka hap ban shim ïa ka jingkitkhlieh halor kine ki jingjia baroh ong ka MPHRC.
Ka MPHRC ka dawa tyngeh na ka Sorkar ba ka dei ban wad ïa ki lad ki lynti ban pyntikna ba ki briew kiba la ngat ha kum kine ki jingjia ki dei ban ïoh ïa ka jingbishar hok namar kine ki jingshah thombor ki la pynhiar dor ïa ka jylla baroh kawei tad haduh ba ka jingshongsuk jingshongsain kam don shuh haduh kine ki sngi.
Kyntang iawai ka MPHRC ka dawa na ka Sorkar ba ka dei ban bat skhem ïa la ka jngiateh kular ba shong ain na ka bynta ban iada ïa ki Hok Longbriew Manbriew ban pynioh ïa ka jingbishar ba hok bad ba laitluid na ka bynta ka jingburom ïa ka jinglaitluid ba tynrai eh.(SP News)
