Shillong, Iaiong 18: Ka FKJGP Southern Riwar Zone (Shella Area) ka pynrem jur ia ki riew thrang snam bad ki riewshim kabu kiba donkti ha kaba byrngem ia u Rangbah Shnong jong ka Shella Dorbar u Bah Tolmolin Youthbon lyngba ki sms ha ka mobile phone ha kine ki khyndiat taiew bala dep da kaba thoh ha ka ktien Nongwei bad byrngem ban shim syndon ia ka jingim jong u tei u Nong Synshar Shnong lyngba ka sms
Kum ka Seng kaba ju iatrei lang bad ki bor Nong pyniaid shnong bad kaba imsngi ban peit ia ka bha ka miat na ka bynta ka imlang ka sahlang ha ka Jaitbynriew hi baroh kawei ka sngew ba kum kitei ki jaitbriew kiba dei ruh ki riew khappud kim don hok satia ban mushlia ia ki kam shnong kam thaw namar ia u Rangbah Shnong la jied da ki paidbah ban peit ia ka bha ka miat bad ka shong suk shong shngain hala ka jong ka khyndew ka shyiap bad ban khanglad ruh ia ki briew kiba nabar katkum ka Riti ka Dustur, ba la suit la shor naduh ki por uba rim uba jah ban pynneh ia ka jinglong trai ha la ka jong ka khyndew ka shyiap.
Lehse lada ka don kano kano ka jing bym bit bym biang kita kiba sngew artatien ki dei ban wan shakhmat da ka lynti kaba dei khlem da shah ialam bakla hangno hangno ruh ym pat ban shu byrngem byrsit tang na kyndong bad naba rieh ban shu kynnoh sniew ia ki Nongialam Shnong khlem da tip ia ka jingshisha baroh.
Kumta ka Seng ka kyntu ia ki bor jong ka Ain ba kim dei ban shim sting ia katei ka kam bad ha kajuh ka por ruh ba lada lap dei ban pynshitom katkum ki kyndon jong ka ain bad kum ka seng da ka mynsiem kaba sngewkhia kan iai buddien ruh ia katei ka kam ban lap mano ba donkti bad kaei ka daw tynrai.
Ha kajuh ka por ka Seng ka ai mynsiem ia u Rangbah Shnong jong ka Shella Dorbar u Bah Tolmolin Youthbon ba um dei satia ban tieng lane kynran dien noh ban ioh ia ka jingbishar kaba Hok halor katei ka jing pyntieng Koh Tympan jong ki Riew Shim kabu namar ba ka Seng hi kan don ha syndah barabor ban ia kit lem ia ka khia ka shon bad ieng skhem ruh halor ka Nongrim jong ka Hok bad ka jingshis
Ha kajuh ruh ka por ka FKJGP Southern Riwar Zone (Shella Area) lyngba kane ka kyrwoh ka pyntip bad pyn kynmaw biang ia baroh ki para Dkhot jong ka seng ba kan don ka General Meeting jong ka seng ha ka 20th April 2013 ha Hall Saitsohpen, Sohra ha ka por 11:00am ban ia mir jingmut ia ki kam jong ka Seng. Kumta la kyrpad ia baroh ki dkhot jong ka Seng na ki Unit bad ki Circle kiba pher bapher ba kin ia poi ryntih ha katei ka sngi ha ka por bad ka jaka bala pynbeit khnang ba ki jingthmu jong ka Seng kin long kiba iaid beit iaid ryntih.(SP News)
