Shillong, Nohprah 19: Ka seng Social Organisation of Meghalaya Against Land Alienation(SOMALA) ka la phah da ka jingthoh sha u myntri rangbah ka jylla u Dr Mukul Sangma ban pynpaw ia ka jingpyrshah ka jong ki ia ka Industrial Policy kaba la pynkylla thymmai.
Ha kane ka shithi kaba la phah sha u myntri rangbah na ka liang jong ka seng ka la dewshai kdar ba ka “Single Window Agency” kaba la wanrah ha u snem 1997 ka la shim ia ka kabu jong ka section 4(1) ha dien ka jingpynkylla ia ka Meghalaya Land Transfers Act 1971 ha kaba ka seng ka niew ia kane ka bynta ba ka long beain.
Kane ka Single Window Agency ka ailad ia ki karkhana ba kin shim bun ki jaka da kaba pynmih ia ka hukum lyngba jong ka tnad Revenue department. Da kaba leh kumne ki company ki ioh ban knieh shibun ka jaka kumba la leh ka Lafarge ha Shella bad bun kiwei ki company ha Jaintia Hills. Kane ka paw shai kdar ba ka sorkar jylla kam kwah ban iada ia ki khyndew jong ki paid riewlum.
Haba ia dei bad ka Industrial Policy 2012 na ka liang jong ka seng ka shim ba kane ka policy kaba kam ban iada ia ki jaka jong ki paidbah ka jylla Meghalaya, hynrei na ka liang jong ka seng ka shem ba kane kan ailad pynban ia ki company ban shim jaka ha ki district, kane kan kham sniew ban ia ka kaba long mynshuwa.
Na ka liang jong ka seng ka buh ia ka jingkylli ba kumno ka sorkar ka lah ban ai jaka ia ki company haba ka sorkar kam don jaka. Na kane ka jingleh jong ka sorkar ka paw shai kdar ba sorkar kan thied ia ki jaka jong ki briew lyngba ka ain Land Acquisition bad ai pat sha ki company.
Naka liang jong ka seng ka ong ba ka sorkar ka dei ban buh teng noh shuwa ia kane ka policy kaba thymmai katba ympat lah ban pynwandur katkum ka riti synsahr jong ka Ri India hapoh jong ka Article 244(2) kaba kdew shai kdar ba ka jylla Meghalaya ka hap hapoh jong ka Sixth Schedule.
Kiwei ki seng bhalang kiba la ai ka jingkyrshan ia kane ka jingthoh jong ka seng ki long ka FKJGP, WYWO,FKS,CSWO,MSM,JYF bad ka seng HNYF kine baroh kila soi lang ha kane ka jingthoh iaba la phah sha u myntri rangbah ka jylla. (SP News)
