Shillong, Kyllalyngkot 27: Ka jylla Meghalaya kan sa pynmih ia ka kynhun pulit kaba kyrpang ban ia khun pyrshah ia ki jingiakhih kane ka kynhun kan hap hapoh ka jingpeit jong ka tnad pulit. Ia kane la rah mynta ka sngi hapoh ka cabinet ha kaba la pdiang ha kane ka jingialang.
Haba kren ha ki nongthoh khubor ha dien ba la wai ka jingialang na ka lian gjong u myntri rangbah ka jylla u Dr Mukul Sangma u la ong ba kane ka jingtyrwa ban don noh ia ka kynhun pulit kaba kyrpang ka long ban tem ia ki jingiakhih bad na ka liang jong ka sorkar ka hap ban pynlut na ka bynta kane ak kynhun.
U myntri rangbah u la ong ba don kam ban pynkhlain ia ka kynhun pulit ban tem ia kino kino ki jingiakynad namar ban pynneh ia ka shong suk shong sain ka dei ka kam jong ka sorkar jylla.
Na ka liang jogn ka myntri kam poh iing ka kong Roshan Warjri kala batai ba ia kane ka kynhun pulit kaba kyrpang yn tip kum ka “Special Force 10”. Kane ka kynhun kam dei ban ia khun pyrshah ia ki kam lehbnoh hynrei ka long ban hikai kyrpang kumno tem ia ki jingiakhih.
La ong ba u snem 2013 ka dei ka snem kaba la jlan eh ki jingiakhih bad kane kala pynlong ia ka sorkar ba ka dei ban don ia ka kynhun pulit kaba kyrpang. Kane ka kynhun pulit kaba kyrpang kan don 1795 ngut ki kynthup ia kiba don ha ophis bad na kane shi battalion kan long kyrpang na ka bynta ki kynthei.
Ia kane ka kynhun yn ai ka jinghikai kaba kyrpang kumno ban leh ha ka por ba ki don ki jingiakhih. Bun sien la shim ia ki pulit jong ka sorkar pdeng ban wanrah ia ki pulit jong ka jylla bad bun sien ka don ka jingeh ban ioh ia ki pulit jong ka sorkar pdeng.(SP News)
