Shillong, Jymmang 01: Kumba ka paw na ki kot ki sla kiba la sam mynta ka sngi ha ka state Level Workshop ha polo towers ha kaba ia dei bad ka jingpyntrei kam ia ka Mehglaya Health Insurance Scheme (MHIS) ka paw shai kdar ba ka sorkar Meghalaya ka ioh commission shi tyngka na kawei ka RSBY Card.
Wat la ka sorkar Meghalaya ka la kam ba ka la pyntrei kam ia ka MHIS ha kane ka jylla mynta ka sngi ka paw shai kdar ba kane ka skhim ka dei ka skhim jong ka sorkar pdeng ia kaba la tip kum ka RSBY scheme, ha kaba ka dor jong ka ka long 30 tyngka na ka bynta kito kiba leit ban register ia ka iing ka sem ban ih ia kane ka jingmyntoi.
Katba ka MHIS kaba dei ka nongpyntrei kam ha kane ka jylla ia kane ka skhim pat ka shim na ki paidbah 31 tyngka ia kawei ka Card, ha kane ka card kaba ki paidbah ki ioh ka la don shai kdar ia ka kyrteng RSBY, ym MHIS kumba la pynsngewthuh ia ki paidbah.
Kane ka skhim RSBY health insurance scheme ka shah ia ki briew ban rung kyrteng tang san ngut na kawei ka long iing.
Na ki kot ki sla kiba la sam mynta ka sngi ha kane ka state level workshop la sam ia kawei ka kot kaba la ai kyrteng “ Web-based Central Complaints and Grievances Management System under Rashtriya Swasthya Bima Yojana”(RSBY) ha kane la thoh shai ba lada don kano kano ka jingshim tam na ka dor bar la buh hapoh jong ka skhim RSBY ki paidbah ki lah ban ai ia ka jingujor ka jong ki sha kane ka website jong ka sorkar pdeng www.rsby.gov.in. (SP News)
