Shillong, Iaiong 02: U myntri jong ka sorkar pdeng u Gulam Nabi Azad ha ka jingwan jngoh ka jong u ia ka North East Indira Gandhi Regional Institute of Health and Medical Sciences (NEIGRIHMS) u la ong ba ka la don mynta ka jingpynkhreh ban tei sa lai tylli ki jaka pule doctor ha kane ka thain shatei lam mih ngi jong ka Ri India ha ka jinglut kaba T.280 klur tyngka.
Haba ia dei bad ka jingpule ia ka kurdan doctor ha kane ka jaka ai jingsumar jong ka sorkar pdeng, la ong ba mynta ka la don ka jingpynkhreh ban pynkiew ia ka jingpynbun ia ki seat na ka 46 sha ka 70. Haba ia dei pat bad ka jaka u la ong ba mynshuwa ka jaka ka dei ban long 25 Akar hynrei mynta pat ka la long noh tang 10 akar.
Haba ia dei bad ka jingduna jong ki doctor ha ki nongkyndong u la ong ba kane ka ktah bha ia ki paidbah jong kane ka thain shatei lam mih ngi jong ka Ri India dei na kane ka daw ba ka sorkar pdeng ka kwah ban pynjlan ia ka por trei kam jong ki na ka 60 snem sha ka 65 snem.
Haba ia dei pat ba ki ba duk u la ong b aka sorkar ka la wad ki lad ki lynti ban ia rap iaki khamtam ia kito kiba don ia ka BPL Cards hynrei ki briew jong kane ka thain kim wan sha khmat ban wad ia ki jingiarap kiba bun eh kiba ioh ia ka jingiarap na ka sorkar pdeng dei kiba na ka jylla West Bengal, u la ong.
Ha kane ka sngi u myntri ka sorkar pdeng u la plié ruh u dur mot jong ka myntri rangbahduh ba la bam kmwai ha dwar u blei ka Indira Gandhi.(SP News)
