Mawkyrwat, Jymmang 10: Ka FKJGP South West Khasi Hills District kala
pynpaw ba ka kwah iaki kam pynroi (Development) ym ban wanrah iaka
ktem (camp) ne ka jaka sah jongki seng kaikhlaw ANVC-B ha katei ka
thain, namar ba kumba ka long mynta ka SWKH District ka dang donkam
shibun ki kam pynroi namar ka dang dei ka district kaba thymmai. Shuh
shuh kila pynpaw ka jingsngewlyngngoh halor ka jingthmu jongka sorkar
ban wad jaka na ka bynta katei ka seng lehnoh ANVC-B ha SWKHD bad ha
West Khasi Hills katba ha Garo Hills kam shym la leh eiei.
Haba iakren bad u nongthoh khubor hadien ba la wai ka jingiaduh jongka
High Level Committee jongka FKJGP-SWKHD kaba la long hynne ka sngi haMawkyrwat, u Bah A Nongrem President ka FKJGP-SWKHD ula pynpaw ba ka seng hadien ba ka sorkar kala pynbna ba kan wad jaka na ka bynta katei ka kynhun seng kaikhlaw na rilum Garo ka ANVC-B, ka seng kam shym la shongkli kti namar ka sngewkhia halor kane ka jingthmu ka sorkar kumta kala leit ban twad jingmut na ki shnong ha kylleng ka District bad
kila pynpaw ba ki pyrshah jur ia kane ka jingthmu ban ai jaka sah iaka
ANVC-B ha SWKHD.
Ula ong ruh ba ka South West Khasi Hills District ka dei ka District
ba dang shu dep ai dang shen ka dang donkam ia shibun ki tnad sorkar
bad ki kam pynroi (Development), namar kumba ka long mynta wat iaka
DSC kaba ka seng kala dawa la slem naduh ba ioh iaka District hynrei
kat haduh mynta kam shym la urlong satia hynrei ka thmu pynban ban
wanrah iaka ktem (camp) ne ka jaka sah jongki seng kaikhlaw ANVC-B ha
katei ka thain.
Shuh shuh ka seng kala pynpaw ka jingsngewlyngngoh halor ka jingthmu
jongka sorkar ban wad jaka na ka bynta katei ka seng lehnoh ANVC-B ha
SWKHD bad ha West Khasi Hills katba ha Garo Hills kam shym la leh
eiei, bad kane ka jingleh ka sorkar ka buh hapdeng ka jingsngew
artatien ia kaei ka ban jia lashai la shisngi.
Shuh ula iathuh ba ha ka jingiakynduh iaki nongialam shnong (Synjuk ki
Rangbah Shnong) kila pynpaw ba kim sngewtynnad bad kim pdiang ia kane, ha kaba kila pynpaw ba da lei lei kin ym ai NOC na ka bynta katei ka
jingthmu ka sorkar.
Ula pynpaw ka jingsngewkmen iaka jingshimkhia ka Deputy Commissioner
ka SWKHD kong R Lyngdoh halor katei ka kam kaba kala pyntip sha ka
sorkar ba kam ioh jaka satia hapoh ka District. Ula ong ba ka seng ka
khmih lynti ba ka sorkar kan pdiang ia kaei ka jingsngew ka sur u
paidbah bad ruh iaka kaiphod kaba la phah da ka DC.
Na ka liang ka seng ka kyntu ruh iaka ANVC- B ba kam dei ban shim ia
kano kano ka jingsngewpher jaidbynriew hynrei ka dei ban pdiang ia
kaei ka sur kaba mih na ki paidbah kumba ka seng kala dep ban twad
jingmut.
Ban shu kdew ba ka sorkar kala thmu ban wad iaka jaka sah jongka
kynhun kaikhlaw na rilum Garo ka ANVC-B ha South West Khasi bad West
Khasi Hills hynrei kane ka jingthmu ka sorkar kala mih pynban ka
jingpyrshah kaba jur na ki paidbah jong kitei ki artylli ki District.
Ha kawei pat ka liang ka High Level Committee kala maham jur ruh iaki
trok kit dewiong kiba iaid lyngba ka surok hapoh ka District ba kim
dei ban kit palat pud kata ia u dewiong ne kiwei pat ki amr poh
khyndew namar ka jingkut palat pud ka wanrah pynban ka jingduhnong ia
u duk u suk uba iaid ba ieng lyngba ki surok ha kylleng ka District,
ha kaba ka seng kala maham ba lada ka lap kan pynshitom katkum ka
kyndon.(SP News)
