Shillong, Naitung 23: U Prasanta Gangopadhyay National Manager u la pyntip ba ka Techno India Group kan pynlut haduh T.1000 klur na ka bynta ban tei ia ka Techno Global University ha kane ka jylla Meghalaya.
Haba kren ha ki nongthoh khubor mynta ka sngi u la ong ba wat la ka sorkar Meghalaya kala dep pass ia ka Techno Global University, bill ha u snem 2008 hynrei na ka daw ba kim pat lah ban ioh ia ka jaka kim shym la lah ban sdang ia kane ka skul bah ha kane ka jylla Meghalaya.
Hynrei mynta ki la ioh ia ka jaka ha Tynring ban tei ia kane ka skulbah bad ki lah ban pyndep ia ki jingtei hapoh ka shisnem. Ka jingheh jong kane ka jaka ka long kumba 56 akar ei ei. La ong ba ia mynta kin sdang shuwa ha ka iing wai kaba don ha Mawlai bad mar ia dep ki iing ha Tynring kin rah noh sha ka jaka ba ki la dep thied.
Ka TGU mynta ka la sdang ban pynrung ia ki samla pule ha kane ka skul bah bad ka thong ka jong ki ka long ban pdiang ia ki samla pule haduh 720 ngut. La iathuh ban a ka liang jong ka University ka la dep ban ia kren bad ki briew ha kane ka nongbah Shillong lada ka jingwan rung klas jong ki khynnah ka palat ia ka 200 ngut ki hapban shim wais huh ki iing.
Haba jubab pat ia ki jingkylli na ka liang jong u Gangopadhyay u la ong ban a ka liang jong ki bor ba dei peit ia ka TGU ki la dep ban ai ka jingujor sha u Vistor jong kane ka skul bah bad sha ki heh pulit jong ka jylla ba dei ban wad bad kem ia ki briew kiba la pynbud nam ia kane ka skul bah kaba kin dang sdang ha kane ka jylla Meghalaya.
U Gangopadhyay u la ong ba ka website jong ka University ka dei www.Technoglobaluniversity.com bad ka website kaba la shna thok da manore ban pynbud nam sniew ia kane ka University jong ki ha kane ka jylla ka dei www.technoglobaluniversity.org. Na ka liang jong u National Manager ba ki don ka jingshaniah ha ki bor jog ka ain ha kane ka jylla bad u ngiet skhem ba yn sa ioh ban kem ia ki riew sniew.
Haba ia dei bad ki kyndon ain u la ong ba ka University ka hap ban bud ia kaei kaba ka jylla kabuh bad kum juh ia ki kyndon kiba la UGC kala buh. U la pynbna ruh ba lada ka Univeristy ka la ba ki don ki khynnah kiba stad hynrei na ka daw jong ka jingduk kim lah ban pule ka Univeristy kan shim ia ki ban pynpule ei bad ynda ki la dep ia ka jingpule ki hap ban siew kylliang da kaba kyrshan ia kiwei.(SP News)
