Shillong, Naiwieng 03: Ka Meghalaya Youth Awardee’s Federation (MYAF) kaba long kawei na ki synjuk jong ki samla kiba la ioh ia ka jingithuh kaba kyrpang lyngba ka khusnam National Youth Award na ka sorkar pdeng halor ka jingnoh synniang ha kiba bun ki bynta ban kyntiew ia ka imlang ka sahlang ha ka jylla bad ha ka ri India hi baroh kawei hadien ba la iohi ia ka jinglong jingman kaba la ktah ia ka jing shongsuk shong shngain ha ka jylla hi baroh kawei lyngba ka jingiakhih ba la pynlong da 13 tylli ki seng bhalang ban dawa na ka sorkar ban pyntreikam ia ka Inner Line Pemit bad ha kajuh ka por ruh ia ka jinglong kuman jong ka sorkar jylla ban khot ia ka kynhun ki seng bhalang sha ka miej jong ka jingiakren.
Ka MYAF kam lah satia ban shu shong kli kti hapdeng kaba kum kane ka saw ka sian namar ka Federation ka sngew ba dei tang lyngba ka jingiakren sngewthuh jingmut hapdeng jong ki Nongialam seng bhalang bad ka sorkar kaba lah pat ban wanrah biang ia ka jing shong suk shong shngain namar ka jing ia pynibor mar kylliang kan ym wanrah satia ia ka jingbha hynrei kan don pynban ka jing ialam bakla ia kiba bun ki khun samla kiba sngew kitkhlieh iala ka jong ka jaitbynriew.
Ka MYAF da ka mynsiem ka jing sngewkhia ka shim ia kane ka sienjam ban pynpaw iala ka jong ka jing sngew namar ka Federation ha kaba ki dkhot jong ka kidei ki samla kiba la ioh ia ka Khusnam Youth Award la ka long ka ha State ne ka National Level ruh kumjuh bad bunsien ki nongialam jong ka Federation ki ju leit ban mihkhmat ia ka Jylla bad wat ia ka Ri India hi ruh sha kiwei pat ki Ri jong ka Pyrthei kum shi bynta ban sngewthuh khambha ia ka jinglong jingman bad ki jingeh jong ki samla sha ki bynta bapher bapher jong ka ri India bad ka pyrthei hi baroh kawei bad ban wad ruh ia ki lad ki lynti ban weng ia ki jingeh baroh lyngba ka jing ia phylliew jingmut.
Ha ka kywoh kaba la phah da katei ka seng “Haba Ngi leit shabar jylla ne bar Ri ruh kumjuh nyngkong eh ngi hap ban pynithuh ia ka jinglong kyrpang (Identity) jong ngi na kano ka Jaitbynriew ngi wan”, kumta ka long kaba dei eh bad kaba donkam palat ban iada ia ka jinglong kyrpang jong ka Jaitbynriew khlem da leh klet noh ia la ka jong ka thymmei, ka MYAF ka sngew ban dawa iala ka jong ka Hok ban ioh jingiada na ki bor sorkar kam long satia kaba bakla lane kaba be-ain hynrei ka dei ban long pat da ka lynti kaba katkum ka riti shynshar paidbah.
Ha kajuh ka por na ka liang jong ka MYAF ka pynrem jur ruh ia ki riew shim kabu hapdeng kine ki jingiakhih dawa ILP jong ki seng bhalang namar ki dak ki shin kila paw shai kdar ba tang na ka bynta ka myntoi shimet ki kloi ban tang kali, thang office sorkar, wat ban tuh ruh ia ki jingdon jingem na ki office sorkar kiba ktah kylla pat ia ki paidbah namar ka sorkar kam dei satia ka nongkynti jongno re jongno hynrei la pynlong iaka da u paidbah, ia u paidbah bad na ka bynta jong u paidbah. Ka MYAF ka kyntu ruh ia ki bor jong ka ain (Pulit) ba kim dei satia ban pyndonkam bakla pat iala ka jong ka iktiar bala pynkup bor ha ki da kaba shu kem pathar bad pyngngat kyndon ia ki samla kiba lui lui (la ka long ia ki dkhot jong ki seng bhalang ne ki bym dei ruh) khlem ki sakhi satar kiba biang ioh kan ialam bakla bad pyn bitar pynban ia kiba bun ki khun samla.
Ka MYAF ka la pynlong ruh ia ka jingbishar kaba bniah ia ka Meghalaya Regulation of Landlords and Verification of Tenants Bill kaba la wanrah da ka sorkar MUA-II ha ka jaka ban pyntrei kam ia ka Inner Line permit kumba la dawa da ki seng bhalang, hynrei la shem pynban ba katei ka Tenancy Bill ba la wanrah da ka sorkar kim don satia ia kita ki kyndon ban teh lakam ia ka jing wanrung jong ki briew kiba nabar hynrei ka long pynban kum ka jingteh lakam ia ki trai ri trai mukuk kiba sah bad ai ing wai, kumta ha kaba iadei bad kane ka bynta na ka liang ka Federation ka sngew ba sorkar kadei ban pyrkhat noh da kiwei ki lad ki lynti khnang ba kan pynhunlang ia baroh arliang mamla (Sorkar & seng bhalang & Paidbah) namar ym lah ban len ia ka jingshisha ba lyngba ki jingiakhih ha kine ki ar bnai tam kala ktah shibun ia ka jing shong suk shong shngain hynrei ym shym la iohi pat ia uta u soh uba ki paidbah ki khmih lynti hynrei la iohi pynban ba ka jingia pyni bor mar kylliang hapdeng ka sorkar bad ki seng bhalang, kane ka jing bym pyndem (adamant) jong baroh arliang mamla kan ym wanrah satia ia ka jingbha hynrei kan pynklumar jingmut bad buh pynban ia ki paidbah ha ka jingeh.
ka MYAF ka kyntu ia ki bor sorkar ba kadei ban long kaba kloi ban khot ia ki seng bhalang sha ka miej jong ka jingiakren la ka long ka kano kano ruh ka bynta khnang ban ranrah pat ia ka shong suk shong shngain ha ka jylla namar ka por ialeh Examination jong ki khynnah skul & College ruh kala dei khnang ba kan ym ktah ia ka lawei jong ki phew hajar ngut ki samla pule, nangta bud sa ka shad Nongkrem kaba dei ka jingleh niam leh rukom jong u Syiem ka Hima Khyrim bad ruh ka aiom jong ka Khristmas kala jan namar khlem pep lada ki jingiakhih ki dang iaid shakhmat kan sa pynsniew dur lut ia baroh bad ha kata ka por iano yn kynnoh.
Ngim lah ban len ia ka jingshisha ba ka jingkiew sted ka jingroi jong ki briew kiba na bar ha ka jylla khlem pep kan wanrah ka jingshong syier ia ka hok long trai halor ka khyndew ka shiap bad kylla rit paid hala ka jong ka ri, kumta la donkam kyrkieh da ka ain kaba khlain ban teh lakam halor kane ka bynta kumba la dawa da ki seng bhalang ia ka ILP. Hooid lehse ka jingthmu jong ka sorkar ka lah ban long kaba bha da ka wanrah ia ka Meghalaya Regulation of Landlords and Verification of Tenants Bill hynrei kan long pat kaba mynsaw lada kim don ki kyndon kiban teh lakam ia ka jing wanrung jong ki briew kiba nabar. Kumba ka long mynta baroh ar liang mamla (sorkar & seng bhalang) ki iai pyneh beit triang hala ka jong ka nongrim namar ki Seng bhalang ki kwah da ka ILP katba ka sorkar pat ka wanrah pynban da ka Meghalaya Regulation of Landlords and Verification of Tenants Bill kaba ia syriem thik kumba pan dohkha ai pynban da u bsein.
Kumta da ka mynsiem kaba sngew kitkhlieh na ka liang jong ka MYAF ka wanrah ia kane ka jingtyrwa ba “Lada ka sorkar kam sngewiahap ia ka ILP bad ki seng bhalang pat kim hun ia ka Meghalaya Regulation of Landlords and Verification of Tenants Bill khnang ban wanrah lang ia ka jinghun baroh arliang mamla bad ban wanrah biang pat sa shisien ia ka shong suk shong shngain ka MYAF ka kyntu jur ia ka sorkar MUA-II hapoh ka jingialam jong u Dr. Mukul Sangma ban shim noh da kawei pat ka sienjam da kaba thaw noh da kawei pat ka Ain (State Act/ State Law) ka bym noh shiliang bad ka ban don ruh ka jingiadei kaba iasyriem bad ka ILP ha kaba kam pher la ka dei da kano2 ruh ka kyrteng hynrei ka ban iada pat ia ka jaitbynriew namar ka MYAF ka don ka jing ngeit kaba skhem ba dei satang da kane ka lynti yn lah pat ban weng lut ia ki jingeh baroh kiba la soh kyrdot baroh shi katta”.(SP News)
