Shillong, Naiwieng 10: Ka Seng Hynniewtrep Achik National Movement (HANM) ha kaba bishar bniah ia ka ain Meghalaya Regulation of Landlords and verification of tenants Bill, 2013, ka la shem ba kane ka ain kaba ka sorkar Meghalaya ka thmu ban pyntreikam hapoh ka jylla ka long ka ain ka bym don khlieh don tdong ha kano kano ka nongrim ha ka ban tehlakam ia ka jingwanrung ki nongwei hapoh ka jylla.
Ha ba kane ka ain kam don jingiadei eiei ha ka ban tehlakam ia ka jiongwan rung ki mynder ha kane ka Ri baieid jongngi balei pat ka sorkar ka bun kam ban pyntrei kam ia ka. Ka sorkar ka mut da kaba pyntreikam ia katei ka ain kan lah ban phong eit miaw ia ka jingbym lah jongka ban teh lakam ia ka jingwan buhai shnong ki mynder ri hapoh ka jylla.
Kane ka ain jingthmu ka sorkar ban pyntrei kam kan nym khanglad ia ka jingwan rung ki mynder hynrei kan pynshitom bad pynbunkam pynban ia ki nongshongshnong ka jylla khamtam ha ki thain sor bad kan nang khring shuh shuh ia ki nongwei ban wan buhai shnong ha kane ka Ri jong ngi.
Ynda la pyntrei kam ia kane ka ain ki Dorbar Shnong Dorbar Thaw kiba la buh la thaw naduh naduh ki por jongki longshwa manshwa kin duhnoh ia ka bor kaba la pynkup ia ki ha ka Sixth Schedule jong ka Constitution jong ka Ri India. Ka Seng ka kwah ban kyntu ia ki bor shnong bor thaw jong ka bri Hynniewtrep ban nym aili ia ka sorkar ban pyntrei kam ia katei ka ain.
Ka Seng ha kawei pat ka liang ka kwah ban pynshai halor ka khubor kaba mih ha ka 6th Nov 2013 ha u Mawphor ba katei ka khubor ka long ka bym don nongrim. Ha ka jingleit ia kynduh ka Seng bad ki bor District ka West Khasi Hills ka long ban iakren ha kaba iadei bad kine ki kynrum kynram kiba mih myn ha kine ki sngi.
Ha katei ka jingiakynduh hapdeng ki nongialam ka Seng bad ki bor Ditrict ka seng kam lah ban ong eiei. Ha kaba iadei bad ka jingkam jong u nongthoh khubor ba u President ka Seng u ong ba ka jingpakhangshnong jong ka HANM West Khasi Hills kan iaid beit lada ki nongialam kim lait ka long ka bym dei bad ka bym don nongrim. Ha ka jingshisha ka pakhang shnong ha katei ka District ka Seng kam lah ban ong eiei namar ba ka dei ka District Unit kaba lah ban ong la yn pynsangeh ne iaid beit shakhmat.(SP News)
