Shillong,Naiwieng 25: Khnang ba ma ngi ki paid nongshong shnong trai muluk jong ka Jylla ngin ia sngewthuh bad ia shai lang tang ha kawei ka jingmut bad ban skhem ka thymmei pyrkhat, nga sngewdei ban pashat jingmut kumne:
Ka Meghalaya Regulation of Landlord and Verification of Tenants Bill 2013 kaba ka Sorkar Jylla ka pynkhreh mynta kam don jingiadei ei ei ruh em bad ki kam MYNDER namar ym don jingong ne pruid dak ei ei ruh em ha ka, shaphang ka jingpyrkhing ia ki bar jylla ne Mynder Jylla (Non-Tribal) don tang khyndiat eh shaphang ki Mynder Ri kata ka mut ia ki bym dei ki nong India ha kaba ka Foreigns Act ruh ka la don lypa. Hynrei katno ngut eh kita ki Bar-Ri ne Foreign National ki don hapoh ka Jylla jong ngi.
Shuh shuh, kane ka kyntien tenants bad tenancy kam dei kaba thymmai hynrei ka dei kiba la ju pyntreikam sha kiwei kiwei ruh ki jylla jong ka Ri India kum ha Andhra Pradesh, Bihar, Goa bad kiwei kiwei. Ha Andhra Pradesh ka don ka Andhra Pradesh (Andhra Area) Tenancy Act 1956 Evolution of Tenancy Reforms in Andhra Area. Ka jingthmu jong kane ka Ain ka long ban teh lakam ia ka jingleh mon bad thombor jong ki nongbat khyndew (Landlord) ia ki nongshongw ai ne shim wai pateng la pateng ha ka rep ka riang ne ban shna iing shna sem etc na kata ka system. Zaminder, Enamdari bad Ryotwari. Kumjuh ruh ha Goa ba la tip The Goa , Daman And Diu Agricultural Tenancy Act,1964 , kane ruh ka long ha kajuh ka rukom hi, ban iada (protect) ia ki nongrep wai (agriculturists, horticulturists) na ki nongaiwai, trai khyndew (landlord) ne ka lah ban long bad ka sorkar jylla.
Kaba nga mut ban kynthoh ka long, ban Ka Tenants Bill shu pyrthuh bud ia kine ki jait ain (Tenant, Tenancy) na kiwei pat ki jylla ka ri India hapoh ka Jylla Meghalaya ka long kaei kaei kaba ngim lah ban pdiang namar ban shu pynbieij ne ban pynkohnguh jubor ia ki paidbah trai muluk bad Sengbhalang ban ong ba ka Meghalaya Regulation of Landlord and Verification of Tenants Bill ba ka dei ka ain ban khanglad ia ki mynder Jylla (Non-Tribal) ka long tang ka kam bieij suda. Shuh shuh ka Jylla jong ngi kam ju don mynno mynno ruh kata ka Zamindari, Enamdari, Ryowari System bad kane kan pynjynjar pynban (harass) bad pynmynsaw ia ki trai muluk.Khatduh iawai kum ka seng ka kyrpad bad kyntu ia ki paid nongshong shnong trai muluk jong ka jylla baroh kawei khamtam ia ki Nongsynshar Shnong bad ki khlieh Nongsynshar ba ngin ia ieng skhe bad tylli lang kawei ban pynbor ia ka Sorkar ban shna ia ki ain ba pyrkhing (control machanism) na ka jingwan rung kyrthep jong ki bar jylla khnang ban iada (protect) ia ka hok long trai la ka long ha ka khyndew ka shyiap, khaii pateng khamtam ha ka synshar khadar jong ngi ki trai muluk.(SP News)
