Shillong, Nailar 18:U Chairman jong ka Imson Football Club, Nongmynsong u Bah Justice Hahshah u la ong ba ka thong jong ka club ka long ban plie ka lad ia ki khynnah nongkyndong ba kin ioh ban ia lehkai ha ki jaka ba paw kum ha Shillong.
Ka IFC la shai ka sngi kan ia lehkai bad ka Lawmali Football Club ha ka First Division, na ka liang jong u Chairman katei ka Club u don ka jingkyrmen ba kin jop ia kane ka jingialehkai la shai ka sngi bad lada ki jop kin sa shah jied ban rung ha ka Super Division.
Haba kren sha phang ka Club u Bah Hahshah u la ong ba baroh ki player ki dei kiba na kane ka jylla Meghalaya hi kiba dei na nongkyndong baroh. Ka thong kane ka Club ka long ban hikai ia ki samla na nongkyndong kiba don ia sap ka phong ka jong ki hynrei kim ioh ia ka lad ha kiwei pat ki club.
Kiba bun na ki player jong kane ka Cluib ki dei na West Khasi Hills South West Khasi Hills bad na Ri Bhoi. U Bah Hahshah u la ong ba lada ki samla kane ka jylla ki ioh ia lad ban shah hikai ha ka rukom kaba dei kim dune ei ei ruh em na kiwei pat.(SP News)
