Ka UCIL kan pynlut T .40.19 cores ban shna pyndep ia ka surok na Wahkaji sha Mawthabah

Shillong, Jylliew 04: Ka Uranium Corporation of  India Limited (UCIL) kan pynlut haduh T.40.19 klur na ka bynta ban shna pyndep ia ka surok na Wahkaji sha Mawthabah bad ka KHADC kaba pyntrei ia kane ka surok ka la buh ia ka thong ban pyndep lut ia baroh ki kam haduh ka siang rong ha u bnai Nohprah jong u snem 2014.

Ka jingjrong jong kane ka surok na  Wahkaji  sha  Mawthabah ka long  20 km bad ka jinglut baroh naduh kaba siew ia kabai jaka haduh ban da dep siang rong kan long T. 40.19 kane ka long ha dien ba la pynbeit thymmai ia ka dor  ha kaba ka KHADC bad ka UCIL ki la dep ban ia munjurlang ha u snem 2010.

Ha kaba sdang ka UCIL ka la mang T.19.88 klur bad ha dien ba la pynkiew ia ka dor sa T.20.31 klur ka UCIL ka la ong ia ka KHADC ba ka dei ban pyndep ia kane ka jingtrei ha ka jinglut kaba T.40.19 klur kata kheinlang ia ka ba la pynlait pisa ha kaba sdang bad kane ka ba dang ai thymmai.

Ban shna ia kane ka surok na Wahkaji sha Mawthabah ka dei ka jingtrei borbah jong u CEM ba mynshuwa u Bah H S Shylla wat hapdeng ka jingpyrshah jong ki seng bhalang u la iaid sha khmat ha kaba pyntrei ia kane ka surok. Ka seng kaba la ialam hato ka snem ban pyrshah ka dei ka Khasi Student Union bad kiwei.

Ha pdeng ki jingeh kiba bun ba ka KHADC ka la shah ha kaba ia dei bad ka jingshna ia katei ka surok ha katei ka jaka kaba dang sah dien , mynta ka KHADC ka ia kynduh pat ia ka jingeh ha kaba ia dei bad ka jingpynlait ia ka pisa na ka UCIL ban siew ia ki kontrak tor kiba la aiti met mynsiem ban shna ia katei ka surok.

Naka liang jong ka UCIL bad ka KHADC ki la ia soi ia ka MoU ba ka UCIL hapoh 30 sngi ka dei ban pynlait ia ka bill ba la phah da ka KHADCm hynrei ka UCIL kam shym la bat ia kane ka jingiateh kular namar kam shym la pynlait ia ka pisa kumba ka la ia theh.

Ka bill kaba khatduh kaba la phah da ka KHADC  sha ka UCIL ka long ha kaba ia dei bad ka jingsiangrong ia kasurok kaba la kot sha ka T.3.5 klur ia kane ka Bill la phah ha u bnai Lber hynrei haduh mynta ka UCIL kam pat pynlait ia katei ka pisa.(SP News)