Shillong, Naiwieng 28: U myntri rangbah ka jylla u Dr Mukul Sangma mynta
ka sngi u la ong ba ka seng UDP ha ka por ba ka don ha ka bor bad ka seng Congress kam juh ia kren ia kane ka phang ha kaba ia dei bad ka Inner Line Permit (ILP). U la kynnoh ba ki liang pyrshah ki shim ia kane ka lad kum ka kabu ha ka sain pyrthei ban pynsngewthuh bakla ia ki paidbah ba tang ka ILP kaba lah ban iada ia ka jingwan tuid ki briew kiba na bar.
U myntri rangbah u la kynthoh ia ki liang pyrshah, ba ha ka jingshisha ki dei ban shim khia ia kane ka kam ba kumno ban wad ki lad ki lynti ban ialeh ia kane ka jingwan tuid jong ki birew kiba na bar.
U la ong b alai snem mynshuwa ha kaba u la shimti ia ka kam myntri rangbah, u la ong ba u bah Paul Lyngdoh u la juh ia kynduh man ka por hynrei ym juh kren ei ei ha kaba ia dei bad kane ka kam ba ia dei bad ka jingwantuid jong ki briew kiba na bar, hynrei u la juh kren tang ia ka jingsah dien bad kumno ban wanrah ia ki lad ioh kam ioh jam.
U myntri rangbah u la pdiang sngewbha ia ka rai jong ka seng CSWO ban ong ba kin nym ia don bynta shuh ha ka jingiakhih la ka long ha kano kano ka phang, u myntri rangbah u kyntu ia kiwei ki seng bhlang ruh ba kin but ia ka nuksa jong kane ka seng.
U myntri rangbah u la ong ba ka sorkar ka kloi ban ia kren bad no bad no, hynrei ka jingiakren ka dei ban long kaba lah ban ia sei ia ka phang kaba long pdeng katkum ka riti synshar paidbah ha kaba lah ban wanrah ia ka jingmyntoi na ka bynta uba bun balang.(SP News)
