Geneva, Switzerland Lber 15: U Bah Dino D.G Dympep uba long mynta u Permanent Representative sha ka UN u la phah ia ka shithi ai khublei sha u Cardinal Jorge Mario Bergoglio na ka Ri Argentina hadien ba u la shah jied kum u Kpa Bakhuid ba 266 jong ka Balang Katholik kaba long kawei na ki Balang kaba hakhmat eh ban ia don bynta pura ha ki kam bapher bapher jong ka Dorbar ki Synjuk ki Ri ne United Nations.
Ha ka shithi kaba la soi bad phah mynta ka sngi lyngba u Silvano M. Tomasi uba dei u Apostolic Nuncio ka Vatican Embassy sha ka United Nations ha Geneva, Switzerland, bad kaba la soi lang da ki 30 ngut ki nongmihkhmat jong ki Seng Pyrthei ha UN, U Bah Dino D.G. Dympep u la ong kumne “ba ka jingshah jied jong u Kpa Bakhuid bathymmai ha ka balang katholik ka long ka jingai mynsiem bad jingpynshlur ia kiba bun bah ki nongiaksaid ia ka Hok longbriew Manbriew ha ka pyrthei baroh kawei namar ka Vatican ka long kawei na ki Dkhot jong ka UN ka don ia ka iktiar bad ka thong ban ialeh bad ban wad ia ki lad ki lynti halor kumno ban nangiai pynkhlain ia ki ain jong ka Hok longbriew Manbriew kiba la pruid dak ha ka pyrthei baroh kawei”.
“Ngi phah ka jingaikhublei kaba kyrpang ia u Pope Francis uba long uwei na ki nongiada ia ka Hok Longbriew Manbriew ha ka pyrthei bad u dei u briew u ju mih skhakhmat na ka bynta ban iaksaid ban ban iada na ka jingshah banbein jong ki briew kiba duk bad kiba shem jynjar ha ka pyrthei baroh kawei” ong u Bah Dympep.
Namartkata, “ngi don shibun bah ki jingkhmih lynti na ka Vatican khang ba hapoh ka jingialam jong u Cardinal Jorge Mario Bergoglio, ngi don ka jingkyrmen ba un nang iai pynshlur ia ki Khraw Pyrkhat kiba don bad ka UN, ban iatreilang ryntih halor kumno ban iai kyntiew ia ka Hok Longbriew Manbriew lyngba ka jingiamir jingmut lang bad baroh ki jait niam halor ka nongrim jong ka jingiatylli bad ka jingpynneh ia ka jingsuk ha ka pyrthei baroh kawei” la pynkut u Bah Dympep ha ka shithi jong u.(SP News)
