Shillong, Jylliew 21: Ka Dorbar Grand Council of Chiefs of Meghalaya, (kaba kynthup Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ki Sirdarship, Ki Dolloi, Council of Nokmas) ka la pynlong ka jingiasyllok kaba ar ha ka 20 tarik June 2013 por 1 baje mynsngi, ha Khasi National Dorbar Hall, Mawkhar, Shillong, ban ia phylliew jingmut bad ki nongialam jong ki Seng Bhalang bapher bapher, halor ka jingpynkylla jingpynbeit thymmai ia ki khyrnit jong ka Sixth Schedule (6th Schedule Amendment Bill 2012 ) jong ka Constitution Ri India, bad halor ka Village Administration Bill 2013.
Ia kane ka jingiasyllok la khot da u Bah John F Kharshiing, Chairman, Grand Council of Chiefs of Meghalaya, & Spokesperson, Federation of Khasi States, ha kaba Ki Khlieh Nongsynshar Ka Ri Hynniewtrep, ki la pynsngew ba ha kawei ka liang ki sngewdei ban don ka Village Administration Bill ha kawei pat ka liang ki pyrshah ia ka jingbsuh lang ia ka Village Development Council hapoh ki kyndon jong katei ka Village Administration Bill namar khlem artatien kan sa kylla long pynban ka jingpynpait bad ka jingpharia ia ki shnong hapoh ki Hima.
Na ka liang ka Dobar ki la pynpaw ia ka jingsngewkhia halor ka jinglong jingman jong ka Sixth Schedule kumba ka long mynta namar ka dei ka Schedule kaba kdup lang ia shiphew tylli ki Autonomous District Council ha ka thain lam mihngi, bad ki la pynsngew ba ha ka jingshisha na ka bynta ki Khasi, Jaintia bad Garo Autonoumous District Council la dei ban don la ki jong ki jong ki Schedule lane ki Chapter lane ki Part khnang ba kan nym don ka jingsngewthuh bakla.
Kum ka nuksa la pynpaw ba katba ha ki lai tylli ki ADC hapoh ka jylla Meghalaya ka khyndew ka dei jong u paidbah katba ha kiwei pat ki Hynniew tylli ki ADC ka khyndew ka dei jong ka Sorkar. Sa kawei ka jingeh ka mih namar bun sien kiba bun ki heh ki hain jong ka tnad Ministry of Home Affairs kiba juh shah bujli na ka por sha ka por kim tip ei ei shaphang ka history ka thymmei jong ki arphew san Khasi States (Federation of Khasi State) bad ngi la juh shem ruh ba kiba bun ki officer jong ki tnad bapher bapher kim tip ei ei halor ka dulir kaba la dep mynjur bad iasoi hapdeng ki Khasi States lyngba ka Instrument of Accession ha ka 17 August 1948 ha kaba ki Syiem kim shym mynjur bad haduh kine ki sngi kam shym don kano kano MERGER AGREEMENT – ka dulir pynwai Hima kumba la pynwai ia ki palat hynriew spah tylli ki Hima sha Ri thor.
Na ka liang ka Dorbar la pynpaw sha ki Seng Bhalang ba na ka jingliet bad na ki jingiakynduh ia ki bor Sorkar India ha delhi ha u bnai June 2012 bad ryngkat ka jingiakynduh ia u Chairman ka Parliamentary Standing Committee, ka Home Affairs, ka tnad Ministry Home Affairs, ka la phah ia ka shithiban ioh ia ka jingmut jong ka Sorkar Meghalaya halor ka jingdawa jong ki Khlieh Nongsynshar ban ioh ia ka Council kaba khlem liang (kaba khlem party), katkum ki jingiateh bad ki jingkular IOA & AA.
Ka meeting ka la wai ha kaba la rai ban kyrpad ia u Chairman ban iawer ia ki Khlieh Nongsynshar ban lum ia ka jingialang paidbah ha kaba ki khun ki hajar kin ioh ban ia thir ia tai halor ka jingpynkylla jingpynbeit thymmai ia ki khyrnit jong ka Sixth Schedule (6th Schedule Amendment Bill 2012 ) jong ka Constitution Ri India, bad halor ka Village Administration Bill 2013, khnang ba katei ka jingpynbeit kaba thymmai kan nym long pynban kaba pyntlot pynban ia ki hok jong ka jaidbynriew rit paid Khasi, Jaintia bad Garo. Na ka liang u Chairman u la mynjur ban ia kren bad ki Khlieh Nongsynshar ban pynkhat halor katei ka jingtyrwa ban lum kyrkieh da ka jingialang paidbah.
Kiba la ia don bad kiba la ia shim bynta ki long ki nongialam jong ka seng KSU, FKJGP, SSSS, Ka Lympung Ki Seng Kynthei (KLKSK), CSWO, TUR, ha ryngkat u Lyngdoh Hima Lyngiong, Sirdar Hima Jyrngam, Secy Hima Marbisu, Secy Hima Riangsih, ki Rangbah Shnong bad kwei kiwei.(SP News)
