Shillong, Rymphang 19: U Drew Von Glahn ba dei peit ia ka Development Marketplace Innovation practice mynta ka sngi u la pynbna paidbah ba ka Wolrd Bank kala plie ia ka lad na ka bynta ki lai tylli ki jylla kane ka thain shatei lam mih ngi jong ka Ri India, ka Jylla Assam, Mizoram bad Meghalaya ba kin ioh ia ka jingiarap kaba T.95 lak tyngka ba kyntiew ia ka jingtrei kam ka jong ki.
Haba kren ha ki nongthoh khubor mynta ka sngi u Glahn u la ong ba kane ka long ka jingsdang ban ai ka jingiarap ia ki paidbah kane ka thain, la ong ba kala buh ia ka thong ba kin ai sha ki shiphew tylli ki seng kiba trei na ka bynta ban kyntiew ia ka ioh ka kot jong ki paidbah.
Ia kane ka skhim la sdang ha India ha u snem 2011 ha ki lai tylli ki jylla, ha Orisa, Rajsahthan bad Bishar, ha u snem 2013 kila sdang ha Jharkhan bad Chatisgrah bad mynta ha kine ki lai tylli ki jylla, ka Assam, Mizoram bad Meghalaya.
Kane ka jingiarap pisa ka long hadpeng 18 haduh 24 bnai, kino kino ki kynhun kiba trei na ka bynta ban kyntiew ia ka ioh ka kot jong ki paidbah ki lah ban apply lyngba ka online ha kane ka website www:dm-india.com bad ka tarik kaba khatduh kan long ha ka 10 tarik jong u bnai Lber.
Kum ka kynhun kan sa wan biang ha Shillong ha ka 28 tarik mynta u bnai ban ia kynduh ia ki paidbah kiba don ka mon ban apply ia kane ka jingiarap kaba ka World Bank ka la plie ia ka lad jingiarap kane ka jingiarap ka dei kaba ka world bank kan ai ei. Kaei kaba ka world Bank ka kwah ban ioh pat ka long ban iohi ba ki briew ki kiew ha ka ioh ka kot, la pynkut u Glahn.(SP News)
