Tura, Kyllalyngkot 08: Ka seng lehnoh ANVC(B) kaba don mynta hapdeng ka jingsangeh ia sait bad ka sorkar mynta ka sngi ka la pynshai ba ka jingsait jong ki ka long ban iada ia la ki jong ki briew ym ban sait ia ki pulit kum ba la kynnoh.
Ha ka jingphah khubor jong u nongialam katei ka seng u Doang D. Shira ba ha katei ka sngi katba ki dkhot ka seng ki dang pdiang burom ia ki briew jong ka seng kiba la jah slem ki pulit bad ki SWAT ki la wan ha ka jaka kaba ki sah bad ki nogialam jong ka seng ruh ki don dei ha kane ka por ba kim ban she ban peitngor namar dei ha kane ka sngi ba la btah ia baroh ki dkhot jong ka seng ba kin poi hapoh ka jaka sah.
Katba dang pdiang burom ia ki para dkhot ka wei ka Gypsy kaba don ia u number ML05 -7209 ka la wanrung hapoh bad ki briew kiba don ha kane ka kali kila sdang ban sei da kit air ialeh la ong u Shira, na ka liang jong ki dkhot ka seng kim banes ban iada ia la ki jong ki briew lada ki sait kumba la kynnoh ki pulit ki la iap u la ong.
Ha kane ka jingialang kaba ki la long ka ANVC(B) ka la shim ia ka rai ba kin leit phai biang sha khlaw namar kim don iing shuh kumba ka long mynshuwa ki la juh ia trei lang bad ki pulit ha kiba bun ki liang hynrei kane ka jingjia mynta kiei kiei baroh kidei kiba la plan da ki bor ba halor.
Haba ia dei bad kane ka jingjia ki la phone sha u SP jong ka Tura ban kylli ia kaei kaba la jia baroh bad ka jubab kaba kila ioh na u SP jong ka Tura la ong ba ka long ba ka jingsah jong ki dkhot ka ANVC(B) ha katei ka jaka ka long beain la ong u Shira ha ka kyrwoh kaba la phah mynta ka sngi.
Ha kane ka sngi na ka liang jong ka ANVC (B) ka dap ka jingkmen ban iohi ba ki dkhot jong ka seng kum u Nawang, Norok, u Ajaju bad u Memang kila wan phai biang sha kane ka kynhun jong ki kane ka jingiakynduh ka jong ki ka long ban kynmaw burom ia kane ka jingdap shisnem jong ka jingiasoi soskular ia suk bad ka sorkar.(SP News)
