Guwahati, Naiwieng 13: Phi lah ban khot ki lehnoh, ki kynhun kieng atiar, ne da kano kano ka kyrteng, hynrei ka poi tang ha kawei ka thong bad kata ka long ban wad ki lad ki lynti kumno ban wanrah ia ka roi ka par bad ka jingshong suk. Kane ka dei ka phang pdeng jong ka jingiakren ha ka jingialang ba la pynlong da ka Institute of Peace and Conflict Studies (IPCS) in New Delhi ha Guwahati mynta ka sngi.
Bun na ki nongkren ha kane ka jingialang kaba la long mynta ka sngi ki la ong ba ka lynti iaid ka dang jngai namar ba bun na ki kynhun lehnoh la ki dei kiba la ia paid ne kiba la seng ruh ki don tang kawei ka thong kata ka jingdawa pisa. “ kine ki dei tang ki kynhun nongtuh nonglute, kumta ym don kam ban ia kren bad ki” la ong u Wasbir Husian ha ka jingkren ka jong u executive director jong ka Centre for Development and Peace Studies (CDPS).
Kane ka jingialang ka long ban ia kren bad ban wad ia ki lad ki lynti kumno ban wanrah ia ka roi ka par hapdeng ka jingdon jong ki kam lehnoh bad kiei ki jingeh kiba ka sorkar ka don ha kaba ia leh pyrshah ia ki lehnoh. Ha kane ka jingialang la don ki heh shipai kiba la shong thait bad ki heh sorkar kum u HN Das chief secretary barim ka jylla Assam bad kiwei kiwei ki riew paw khmat.
Ha kane ka jingiakren la ia mir jingmud ruh kumno ka jingioh suk ban thied ia ki tiar ialeh, ki rukom pyntrei kam kumno ban wanrah ia ka jingsuk bad ia ki jingdawa jylla la ka jong, ka jingmih ki seng lehnoh bad ka jingkhrong pisa jong ki na ki paidbah.
La iakren ruh ia ka jingeh jong ki nongthoh khubor hapoh ka jylla Manipur ha kaba bun ki hap ban trei hapoh ka jingshah byrngem na ki seng lehnoh hynrei mynta ki briew ki la sdang ban kren pyrshah ia ki kam lehnoh bad ka jingiaid paidbah kaba dang shen ha Dimapur ka la kren ia kaei kaba ki briew ki sngew.(SP News)
