Shillong, Jylliew 05: U Lat ka jylla u R S Mooshahary ha ka jngkren plie ka jong u ia ka jingialang bas hi sngi ban ia kren halor ka phang “ Kumno ban pynneh pynsah ia ki um ki wah ia kaba la pynbeit da ka Meghalaya Basin Development Authority (MBDA) u la kynthoh jur ha kaba u la ong bun na ki plan trei kam jong ka sorkar ki pulom namar kam don ka jingpyntrei kam bha ia ki.
U la ong ba ki MP, ki MLA bad ki ophisar ki dei ban leit sha ki nongkyndong ban peit la ia ki skhim la pyntrei kam ne em ha ka rukom kaba dei. U la ong ba ka sorkar ka don shibun ki skhim hynrei ki pulom namar kam don ka jingpyntrei kam ha ka rukom kaba dei bad kaba kut ka long ba ki plan baroh ki pulom ei.
Haba ia dei bad ka jingpynneh ia ki um kiwah na ka liang jong u Lat u la ong ha kane ka jylla ka um ka bun hynrei ka jingeh ka long ba kumno pat ban pynneh pynsah ia ka. U la ong ba ha ka rep ka riang dei ban pynshlur ia ki jingring um kiba rit ia kaba la tip kumka Micro Irrigation bad ia ka drip irrigation.
U la ong ba ha ka khana pateng jong u khun bynriew ha kip or hyndai ka la don ka jinghiar thma na kawei ka hima sha kawei pat ban pynheh ia u pud u sam, mynta ymdon jaka shuh hynrei ka thma kaban sa wan ka long halor ka jingiaknieh um. Ka um ka dei ka jingim jong u briew.
Ha ka jingkren jong u Deputy Chief Minister jong ka jylla u Bah Rowell Lyngdoh u la ong ba palat 50% na ki nongshong shnong jong ka jylla ki dei ki briew ki don hapoh u lain jong ka jingduk bad lada dei ban kyntiew ia ki dei ban kyntiew ia ka rep ka riang da kaba pynbiang um ia ki.
Ha kane ka jingialang kaba la long mynta ka sngi ki la don bun kiba ia ai jingmud ba dei ban pynneh pynsah ia ka um ka kwah bad ban ialeh katba lah ban pynioh ia ka um kaba khuid kaba suba.(SP News)
