Shillong, Nailar 04: Ki paidbah jong ka shnong Mawiong kaba don ha jan Tynring ha ka miet sngi saitjain ki la ioh ban kem ia ki 7 ngut ki nongtuh surok ha dien ba ki la ioh ia ka jingpyntip na ki arngut kiba shah lute.
Ha ka miet sngi saitjain u Bah E Kharkongor bad u bah R Kharmalki na ka shnong Tynring ki la leit buh ia ki paralok ha ka shnong Thangshalai kumba 10 baje ei ei mynmiet bad ynda ki la wan phai ka kali Bolero kaba ki shnong kala shah khang lynti ha kawei ka trok kaba don ia u number AS01DC 1965.
Ki briew kiba don ha kane ka trok ki la lute ia kine ki ar ngut ki rangbah bad na ka met jong ki ki la ioh ia ka pisa T.700/- tyngka, ka mobile bad ka type kaba don ha ka kali. U Bah Kharkongor bad u Bah Kharmaliki ki la pyntip sha ki bor shnong Mawiong bad ki la ia mih paidbah bad kem ia kitei ki briew kiba don ha ka trok.
Kiba la ioh ban kem baroh ki long 7 ngut katba u nongniah ia katei ka trok u ba la tip kyrteng kum u Bah Hamles Kurbah na ka shnong Nongkliew u la laitphet. Ia kine baroh 7 ngut la aiti sha ki pulit jong ka Mawdiangdiang police out post ban leh ia kaba don kam.
Ki hynniew ngut ki nonglute surok kiba la shah kem ha ki paidbah jong ka shnong Mawiong ki long u Raymon Warjri na Mawlai Mawdatbaki, Headingson Kurbah na Nongthliew, Lamphrang Pakyntien na Mawlai, Samkisoh Shabong na Nongthliew, Lamdingstar Kharkrang na ka shnong Krang , Klossing Rani na Mawumkah bad u wei u khynnah ba dang 16 snem. Ka iing bihsar ka la shah ba ki pulit kin san san sngi ia ki ha ka police custody. (SP News)
