Shillong, Kyllalyngkot 31: Lai ngut ki Khasi na ka shnong Umtyrnga kaba hap ha Jirang Block, Ri-Bhoi District, Meghalaya, ki la shahkem ha ki pulit Assam ha kine ki khyndait sngi. Kine ki lai ngut kiba shah kem ki long u bah Ebren Khongjoh, 45 snem, Bah Tiling Pyngrope 40 snem, Bah Ek Pyngrope 38 snem.
U Bah Kodios Thongni, haba pyntip sha ki lad pathai khubor halor kane ka jingjia u la ong, “kine ki lai ngut ki la shahkem ha ki pulit Assam, katba ki dang ia leit wad sha khlaw ia uwei u briew uba don jingduna ha ka bor jabieng uba la jah na shnong bad kit ruh ia kawei ka suloi SBBL ha ka met tang ban shngain ha ka por ba ki don ha khlaw.” U la bynrap ba kane ka suloi ruh ka dei kaba don licence.
Ia kine ki lai ngut la set ha Gorsub Police Station, Kamrup District, Assam bad la pynngat ia ki ha ka kyndon Arms Act, u la iathuh shuh shuh.
“Ki pulit Assam kim dei satia ban wan tuklar ia u pud u sam ka jylla Meghalaya bad lada kane kan dang iai jia kan long kaei kaei kaba sngewsih. Kane ka pyni ruh ba ka Sorkar kam don jingkitkhlieh satia ban pynbeit ia u pud u sam ha kaba ki paidbah kiba shong basah ha khappud ki shu kylla sohpdung na ka por sha ka por. Haduh lano ka Sorkar Assam-Meghalaya kin iapynbeit ia u pud u sam,” u la kynthoh.
“Nga la shimkhia ban iakren ia u Nongsaidaiñ ban iakhun ia ka mukotduma khnang ban iohsei noh ia ki na along. Nga kyrpad ia kiwei pat ki para rangbah ba kin shimkhia lem ban iarap ia kine ki lai ngut. Ha ka sngi balang jong ka taiew ban wan ngan sa hiar sha Assam ban leit jngoh ia ki ryngkat bad u nongsaidain,” u la ong.(SP News)
