Jowai, Rymphang 19: Katba ki paidbah bad nongmihkhmat ka rilum Khasi & Jaintia ki dang bunkam ha ka ban jied Nongmihkhmat sha District Council da kaba leit khroh VOTE ha man la ki lad, ki briew ba shong syier ha ki thain khappud bad ka Assam kata ha Block 1(Elaka Labang Nangphyllut) ki dang iaisah hi ha ka jingmad ia ki lanot ha ka jingshah pyndik ym na ki Kaikhlaw hynrei na ki pulit ka Karbi Anglong District.
Ha ka 13 tarik mynta u bnai por shiteng synnia, ki pulit ka Ka District ki wan jam shapoh u pud ka Meghalaya ha ka shnong Mukroh bad kem ia ki saw ngut ki rangbah kiba la tip kyrteng kum u Ma Holy Lamare, Ma Arland War, MA Bun Myrten bad Pynhun Lamare.
Kane ka jingrahbor ia kine ki rangbah ka buh ia ki ba haiing hasem jong ki ha ka jinglyngngoh namar la kem ia ki khlem ka Arrest Warrant ne khlem da ai ka daw balei la kem ia ki bad ki khlem iathuh ruh shaei kin rah ia ki. Tang hadien ka jingwadbniah, la tip ba ki la rah ia ki sha Hamren kaba long ka jaka kaba jngai bha na Mukroh.
“Ngi pynrem jur ia kane ka jingleh khawpud bad bymnang ain ki pulit Assam bad ka jingkem beain ia kine ki saw ngut ki rangbah, bad ngi kwah ban kylli na ka sorkar Meghalaya, shaei kito ki pulit battalion kiba juh don ha Mukroh kiba ai jingiada ia ngi?”, la pynpaw u samla Hamarbamut Muskut, President ka KSU Mukroh Unit. “Ki paitbah ki sngewduh jingkyrmen ha ka sorkar Meghalaya namar kumno ki pulit na Assam ki wan leh donbor hapoh ka thain jong ki(ba hap hapoh Meghalaya).
Kane ka jingleh hanga mei ki pulit Assam bad ka jingbym shimkhia ki bor ka Meghalaya ka pynsngewsih bad pynbitar ruh ia ka jaidbynriew,, la pynpaw shuh une u samla “Ha ki por ilekshon, ki wan khroh ia ka vote ki paidbah ka Mukroh bad kiwei ki shnong napoh Block 1, te mynta pat shaei ki nongmihkhmat ban ia peit lem ia kane ka khia ka shon jong ki pat mynta. Ka seng kyntu ia ka sorkar ba kan pynioh ia ki da ka Police Outpost ha Mukroh kaba long ka mat jingdawa jong ka KSU bad kiwei ruh ki para sengbhalang ha kine ki por ba la dep.
Kumta ki dawa na ki bor jong ka sorkar Meghalaya ba kin tuklar lem ban pyllait ia kitei ki saw ngut ki rangbah”, la pynkut artad ia ka khubor da ka KSU Mukroh Unit.(SP News)
