Shillong Nohprah 13: Ka liang pyrshah lem bad ki MLA na ka liang synshar mynta ka sngi ki la ther tyngeh ia u myntri kam poh iing ka jylla u Bah HDR Lyngdoh ha kaba ia dei bad ka jingong ba ym don kam ban buh ia ka police out post ha ka shnong Psiar kaba ia khap bad ka Block II.
Haba jubab ia ka jingkylli jong u Bah ECB Bamon MLA jong ka Nartiang, ha kaba ia dei bad ka Police Out post ha Psiar na ka liang jong u myntri kam poh iing ka jylla u Bah HDR Lyngdoh u la ong ba ka sorkar kam don jingthmu ban buh ia ka police out post ha katei ka jaka namar ki kam runar ki duna.
Halor katei ka jingjubab jong u myntri na ka liang jong u Bah Bamon u la ong ba u dap da ka jingsngewlyngoh ban ioh ia kum katei ka jubab namar ki briew ha katei ka jaka ki shah ban bein ha ki lehnoh na Karbi, da ka ki khrong musur na ki trai shnong kumno na ka liang jong ka sorkar kam don jingtip ha kaba ia dei bad kane.
Halor jong kane na ka liang jong u myntri u la ong ba ha duh mynta ym don jingtip ei ei ia kaba kum kata ha dien ba la ban jur da u MLA jong katei ka jaka na ka liang jong u myntri u la ong ba ka sorkar kan sa wad jingtip halor jong kane.
U nongialam ka liang pyrshah u Conrad K Sangma u la ong hato kham kordor ka rule ne kham kordor ka jingim briew, hato ka sorkar ka ap haduh ban da ia iap briew bad hangta kan sa buh ia ka police out post. Hato kam dei ka kamram jong ka sorkar ban iada ia ka jingim ki briew.
Na ka liang jong u Bah Paul Lyngdoh ula ong haba u myntri kam poh iing u iaid ha kane ka nongbah Shillong saw san tylli ki kali pahara ia u myntri kam poh iing hato kitei ki briew kim don kam ia ka jingda, kaei ka jingthew kaba la ai ka jingpahara kaba khlain ia u myntri kam poh iing bad kaei ka jingthew ha kaba ia dei bad ka jingim jong ki briew ha ka thain Psiar.
Ka liang pyrshah ka la dawa na ka sorkar ba ka dei ban buh noh mar dor ia ka police out post ha Psiar, ki la kynthoh ba kane ka jingjubab jong u myntri kam poh iing hapoh ka iing dorbar ka kdew shai kdar ba ka sorkar kam don jingkit khlieh ia ki paidbah.(SP News)
