Shillong, Iaiong 23: Ka jingialang ba khatar jong ka seng Meghalaya State Government Employees’ Federation (MSGEF) kala long mynta ka sngi ha kaba ka sorkar ruh ka la ai shuti shiteng sngi ia ki nongtrei ban ailad ia ki ban ia shim bynta ha kane ka jingialang.
Ha ka jingkren jong u Bah WMS Pariat kum u kongsan ha kaneka sngi, u la ong ba ka sorkar Meghalaya ka siew kham bha ban ia nujor bad kiwei ki jylla ha ka Ri India ha kaba ia dei bad ki nongtrei sorkar.
Ha ka juh ka por u la kyntu ia ki nongtrei baroh ba ki dei ban trei hok iaka kam namar ka sorkar ruh ka la ai ia kaei kaba ki nongtrei ki don kam, ka long ka jinglehrain ban shah kynthoh ha ki kot khubor ia ka jingle jong ki nongtrei. Ki dei ban kynmaw ba ka kam jong ki ka long na ka bynta jong u paidbah.
Haba ia dei bad ki jingdawa jong ki nongtrei u Bah Parait u la ong ba wat la ka sorkar kam lah ban ai lut ia kaei kaba ki dawa hynrei ia ki jingdawa kiba kongsan ka sorkar ka la ai sha ki nongtrei, u la ong ba ka jylla ka la kiew ha kiba bun ki liang hynrei ka don shibun ki bynta kaba ka jylla ka dang dei ban leh.
Ha kane ka sngi ka seng ka la jied ruh ia ki nongkit kam kiba thymmai naka bynta jong u snem 2013 haduh 2015, u Bah John A Massar u la shah jied kum u president ba thymmai, u Bah Susil Syiemlieh kum u Secretary General U Bah F Kharkongor u la shah jied kum u nongbat pisa ka seng. Ia kane ka seng la sdang ha u snem 1979 bad ka kamram jong ka ka long ban peit ia ka jingdon kam ki nongtrei sorkar kum kawei ka kynthun.(SP News)
