Shillong, Jymmang 19: Ka Mawsynram Constituency Peoples’ Welfare
Association (MCPWA) Shillong kaba dei ki nongshong shnong ka thaiñ
Mawsynram kiba sah ha Shillong ka phah ka jingsngewlem sha kito ki
longïing longsem kiba la shah pynjulor ha ka eriong myn ha ka miet
jong ka 9 tarik mynta u bnai.
Ka seng ka phah jingsngewlem kyrpang ia ka longïing ha Hurupukni hajan
Dangar namar ka jingkhlad kawei ka longkmie ha ka jingshah pom u
pyrthat ha katei ka miet kumjuh ruh ka pynpaw ka jingainguh ia u Blei
Trai kynrad uba la ker la da ia ki dkhot jong kito ki longïing kiba
la lait na ka jingjia ba sngewsih namar ka jingban ki diengbah dieng
ia ki ïing ki sme kiba la kyllon ha ka jingkhyrwit ka eriong.
Ha ka juh ka por ka seng ka ai jingkhublei kyrpang ia u BDO, ki
ophisar ka Mawsynram Block, ia ki Magistrate ka ophis u Deputy
Commissioner (DC) East Khasi Hills District bad ia u MLA/MDC ka thaiñ
Bah Pynshngaiñ N Syiem kiba la hiar kyrkieh sha kitei ki shnong ban
leit peit ia kito ki longïing kiba mad ka jingsngewsih.
Ka seng ka kyntu ruh ia ka sorkar ba kan pynstet ban pynpoi ia ki
jingiarap sha kito ki longïing kiba la mad ha ka jingshah khyreit ka
eriong kum ha ka thaiñ Lawbah, Pyndensohsaw, bad Hatmawdon. Kane ka
long katkum ka kyrwoh ba la phah da u Bah Pusterwell Disiar,
Organising secretary.(SP News)
