Shillong, Nohprah, 03: U Bisheshwar Das u trai jong ka dukan sha ha Bishnapur u ba la shah thang ha ki briew kiba ym lah ban tip ha ka 16 tarik jong u Naiwieng u la khlad noh mynta ka sngi ha ka por mynstep ha NEMCARE hospital Guwahati.
U Das u la khlad noh ha ka por 4 baje mynstep mynta ka sngi, u ne u trai jong ka dukan sha kaba don ha Bishnapur u la shah thang ha ki briew kiba ym lah ban tip kiba la theh ia u da ka petrol bad wiang ding ia u ha ka 16 tarik jong u Naiwieng.
Haba ia dei bad kane ka jingshah thang jong u Das na ka liang jong ki pulit ki la kem ia saw ngut ki dkhot jong ka KSU halor ka jingsuba ba ki lah ban don kti ha kane ka jingjia. Kine ki dkhot ka KSU kiba la shah kem ki dei na Lawshotun.
Lah ban pynkynmaw ba ha u Risaw ki riew sniew kiba ym lah ban tip ki la leh ha kane ka juh ka rukom ha kaba ki la leit ban thang ia u trai jong ka Meghalaya Machineries ia u ba la tip kum u Vikash Nandwal bad une ruh u la khlad noh ha kawei na ki Hospital ha Delhi.
Na ka liang jong ki nongshong dukan jong ka thain Bishnapur mynta ka sngi ki la khangdukan lut baroh kum ka dak jong ka jingsngewsih halor ka jingkhlad jong u tei u Das u ba dei u trai jong ka dukan sha ha katei ka jaka.(SP News)
