Shillong, Risaw 31: Hadien ka jingbteng u samla Pynskhemlang Nongshlong ia ka jingshah thngan kaba 4 miet bad 3 sngi hapoh phatok kaba don ha nongbah Shillong, hynnin ka miet ki pulit kila pyllait noh ia une u samla ryngkat bad ki nongbud ki jongu khlem kano kano ka jingteh kyndon, watla kem ia une u samla halor ka nongrim ba ula pynkhein ia ka 144 CrPC kaba pynjari ha nongbah Shillong da kaba shong shah thngan ha phyllaw jong ka ophis Deputy Commissioner ka East Khasi Hills.
Ki nongbud jong u samla Pynskhemlang kila iathuh ba u Pynskhemlang yn ym shong kli kti hynrei un iai bteng beit ia ka jingshah thngan katba ka sorkar kam pat lah ban leh eiei halor ki mat kiba ula buh hakhmat ka sorkar jylla.
Shuh shuh kila iathuh ruh ba une u samla yn leit ban ban shah thngan ha Langpih ha ka 2 tarik u Naiwieng bad kila iathuh ruh ba bun ki paid nongshong shnong kane ka thain kin iashimbyntalang.
U bah Ephrim Khardewsaw uba la shah kem lang bad u samla Pynskhemlang Nongshlong hadien ba ula lait na phatok, ula ong ba ym sngew eiei watla ula shah set ha patok hynrei ula pynpaw pat ia ka jingsngewsih ia ka jingleh tohmet jong ki pulit kiba la shu shoh jem ia ki kum ia ki runar kiba la leh ia ki kam sniew.
Shuh shuh ula ong ruh ba ki pulit kila pynbor ia ki ban sangeh noh ia ka jingshah thngan, hynrei kila kyntait ia kane ka jingpynbor bad kila bteng beit ia ka jingshah thngan hapoh phatok.
U bah Ephrim ula ong ruh ba lada ka sorkar kam leh eiei halor ki mat jingdawa un bteng beit ia ka jingshah thngan bad u samla Pynskhemlang na ka bynta ban ai jingiada ia u paidbah ha khappud bad ban pynbeit noh ia u pud u sam hapdeng ka Assam bad Meghalaya bad ha kajuh ka por ban theh ia ki kam pynroi ha ki thain khappud.(SP News)
